Ka sorkar jylla da pynlait ko ya ka song poisa ka Jaiñtia Hills Autonomous District Council (JHADC) kawa Rs.30 klur kawa man ka bhah na ka dan yong u mooyong.
Ini toh hadien wa ki dkhot ka Executive Committee ka JHADC wa ka District Executive Committee yong ka NPP da kyrpaad ki ya u Montri Rangbah, u Conrad K Sangma haka 6 tarik uni u bnai yow yarap pynlait noh ya ka poisa yow ye u su tulop chwa ka Behdieñkhlam.
U Chief Executive Member (CEM) ka JHADC, u Thombor Shiwat ynne da pyntikna u wa ka sorkar jylla dadep ko wow pynlait ya ka poisa kawa Rs.30 klur cha ka Council.
Da ong u leh wa na kani, kawa dang sah man ko sa Rs. 50 klur na ka dan mooyong wa Rs. 9.91 klur na u moochuni wa kiwi kiwi.
Neiliang u Montri Rangbah, u Conrad K Sangma da kular u wow chimkhia u pynlait sa kini kiwa dang sah ha kini ki sngi wow wan, da pynrap u CEM.
U CEM waka Executive Committee waroh kawi da pynsñiaw ki yei sñiawngooh ya u Montri Rangbah uwa da chimkhia wow yarap ya ka JHADC deiwa pynlait ya ka bhah ka Council neibynta wow yoh u pynlait yaka tulop kiwa kreh.
“Ini i chimkhia u Montri Rangbah wow pynlait ya ka poisa pynyoo ko wa toh u bru wa ksoh yeiwa da kular u,” da ong u Thombor wei kyrmen u leh wa ka sorkar MDA 2.0 hei yahkhmat u Montri Rangbah u chimkhia ko leh wow pynlait ya ka bhah ka Council man-u-bnai khnang wym thut i pynlai ya ki kaam Council.
Puræ leh: Kular u Conrad wow pynlait ya ka poisa chna ya ka Iawmusiang deilang ka bhah poisa ka JHADC
Discussion about this post