Hadien wa ka Executive Committee ka JHADC da pynmih ko yaka Office Order ha ka 10-06-25 deiwa rai u su tulop lut ya waroh ki MDC thymme ka JHADC wa dang dep jop wa kynthup leh ki sahep wa kiwa kreh wa dang dep thung thymme, ynne ka sngi neiliang ki MDC ka VPP lyngba u Awhai Andrew Shullai uwa man leh uwa yahkhmat ka liang pyrchah da pynsñiaw u i yei wym yahaap hajrong kani ka rai neidaw wym em leh ki katkam ka luti wa toh.
Hawa klam cha kiwa thoh khubor, u Awhai Andrew Shullai ong u kani ka hukum wa da pynmih da ka EC toh kawa phylla tam neibhah ha ki snem wa chadien ka tulop wa sah yong uwon uwon u bnai manda yoh poisa da yaleh u su pyndep chwa ya ka warim na uwi u bnai hadien uwi won deiwa lai ryntih kamwa lai ki bnai.
Wei kamwa ka tulop yong kiwa kreh ka JHADC sah ko nadooh u bnai October 2024, ong u lada toh wa yoh poisa toh u su pyndep chwa nadooh u bnai wa sah u October, November, December ter ter.
Tangwa lyngngoh won u wa lyngba kani ka hukum wa da pynmih toh wa lada yoh poisa u su tulop ar bnai dei thmu ki u su du chibnai yong u snem 2024 itæ toh u bnai October deiwa kynthiar cha u bnai March næ April yong u snem 2025 khnang yow yoh bhahlang ki MDC thymme khlem da su dep yeiwa sah.
Katkam wa ong u Andrew, i daw wa da leh yeini toh wa ki MDC ka liang shynchaar hi kiwa dang dep jop Election ki wym ye u yang u chah hadooh wow dep su chwa ya waroh ka tulop warim wei yow ya yoh ryntihlang kamwa ka tulop yong ki sdang ko nadooh u bnai March yong u snem 2025.
“Hao neiliang ki MDC ka VPP yong i leh em kiwa dang dep jop thymme tangwa ki won ye hi ki u yang u chah neibhah sñiawthooh i wa wan i heini ym u kamai poisa tangwa u chakri ya ki paidbah lyngba ka District Council, katwa ki MDC thymme wa em ha ka liang synchaar won ileh ym ye yang chah ki. Lada heini i rukom yosar wot ya ki kyndon krehkaam ka Council leh daw pynkylla ko neini chakhmat,” ong u Awhai Andrew Shullai.
Discussion about this post