U Montri Rangbah ka jylla, u Conrad K Sangma ynne da kaweh lama u wow pynlait pait ya 30 tylli ki ki Bus wa tip kam ki Shared School Bus System wa ki karai kamai neibynta kiwa uiñke suwari kiwa tip kam ki Prime Tourist Vehicles wei da pynlait leh ya ki kari neibynta ki kaam rep wa tip kam ki Prime Agriculture Response Vehicles ha ka yalang wa pynman ha U Soso Tham Auditorium, Shillong.
U Conrad da ong u wa kini ki Bus toh kiwa da pynlait hapoh ka Sustainable Transport and Efficient Mobility Society (STEMS) Program yow pynsuk yei lai i wan wei wow pynkyllooid ya ka sor Shillong iwa da man i kaam wa da sñiawkhia da waroh. Da ong u leh wa da dep tyrwa boon ki buit kammon wow pynkyllooid wei i wanrah da ka STEMS toh kawa da pyrkhat bha.
Heiyatoh wa ki kari Prime Agriculture Response Vehicles, u Conrad da pyntip u wa ki warep da maad ki ya iwa boon i eh i khoo heiyatoh wa ki kari yow kit ya ki mar yong ki cha ki yaaw ki haat, kamtæ da booh ya kini ki kari yow pynkhlan yei yoh nong ki warep.
Ki kari kamai Prime Tourist Vehicles won toh yow yarap u pynku ya ki kaam uiñke suwari kamjooh yow pynyoh kreh ya kiwa seiñ khih wei da em leh kiwa boon kiwa daw leh yow pynkyllooid ya ka sor Shillong.
Kini ki Bus toh kiwa daw pynemkaam lang da ki skur wei kamjooh leh ye u pynemkaam da kiwa lai kreh wei ye wow e wai ki ha ki sngi wym man kreh man skur wow chim wai neibynta ki kaam uiñke suwari.
Hapoh kawi pa kawi ka Bus da em 5 tylli ki CCTV Camera, kiwa da pyndait GPS wa ki LED Screen yow pynyoo yei luti wa lai. Kiwa yah ya kini ki Bus daw sikai ya ki da ka Meghalaya Skills Development Society.
