U montri rangbah ka jylla, u Conrad K Sangma ynne da pynlait u ya ka Mobile App wa tip kam ka Pensioner’s Life Certificate kawa pynemkaam ya ka Face Recognition.
Ya kani ka App da pynlait ha i emlang u montri ka chnat Information Technology, u Hamletson Dohling, u Chief Secretary, MS Rao, Additional Chief Secretary, ka Rebecca Suchiang wa kiwi kiwi.
Kani ka Life Certificate Verification toh ka wow pynsuk ya kiwa da chong-ngiah heiwa ym hap lai de ki cha u Treasury Officer næ Pension Disbursing Authority wow yoh ya ka bai baam tymmen yong ki heiwa daw ye ki u pynemkaam ya ki Life Certificate, Physical Appearance, Biometric Finger Print Verification System lyngba ki Kiosk næ Jeevan Pramaan.
Wow ye u pynemkaam ya kani ka App emkaam wow lai cha ki yung krehkaam Treasury Office.
Hawa e yei klam, u Conrad K Sangma da ekhublei u ya ka Finance Department wa NIC kiwa da pynwandur ya kani ka App wow pynsuk ya ki bru kiwa da chong-ngiah wei ym emkaam de ki wow lai luti cha ki yung krehkaam sorkar khamtam kam ha ini i por wa em ka khlam COVID-19.
U Chief Secretary, M S Rao da ong u wa ka jylla Meghalaya man ko kawi na ki jylla kiwa da chna ya kam kani ka App kawa daw pynsuk ya kiwa da chong-ngiah wei man ko leh kawa chngaaiñ.
Wow pynemkaam ya kani ka App daw emkaam ya ka Smart Phone wa ka Internet heiwa daw yoh ki ya ka bai baam-tymmen khlem mih na yung wei ka Face Verification u krehkaam ko chisien ynru bnai heiwa ki yutip (Record) daw em ki ha ka yung krehkaam Treasury Office wow phah ya ka poisa chisien chi bnai.
Ya kani ka App daw ye u Download na Google Play Store deiwa pynekaam leh ya ka link https://play.google.com/store/apps/details?id=com.plc.meg wei ym slem de daw em ko ha ki Apple Apps Store neibynta ki Phone iOS.
