Ha ka yurim wow pynim pynneh pynsah ya ka niam, ka rukom, ka dustur riti wa da pynjooh sikai ki warim, ki manchwa longchwa, kamtæ ka Seinraij Kur Shylla Byndihati wa em ha East Jaiñtia Hills District ha ka sngi Musiang 29 Wisu da pyndep ki ya ka Chaad Pastieh kawa man kawi na ki Cahad Niam wajooh leh næ pyndep chisien chisnem.
Kani ka rukom dustur toh kawa da leh da pyndep ha ka yurim wow e ngooh e dem ya ki Blai chnong Blai Raij kiwa da e i da i kær ya ka chnong ka Raij kamjooh ya ki khon ka Kur Shylla na ki por cha ki por heiwa dei kyrkhu yong ki, ka chnong ka Raij ka kur ka jait hapoh ka chnong Byndihati da man ko kawa yoh yei chongsuk chongsaiñ wei roi i par liang wa nang.
Ya kani ka Chaad Pastieh ha uni u snem da wan sakhilang da kiwa mihkhmat yong ki yung dorbar chna aiñ waphær ka jylla kiwa kynthup yow A.L.Hek, Art & Culture Minister, u Sniawbhalang Dhar, Transport Minister, u Kyrmen Shylla, Social Welfare Minister, u Dr. Shanky Shangpung, Chairman JHADC, u Fineliness Bareh, MDC JHADC wa u Bajop Pyngrope, MDC KHADC.
U A.L. Hek hawa klam kam u kongsan yong kani ka sngi da yaroh u ya kiwa yahkhmat ka Kur Shylla Byndihati kiwa da ye u pynman ya kani ka Chaad Pastieh kawa pynyoo yei man kyrpang ka jaitbru deiwa ye u bood u ksooh ya ka niam ka rukom, dustur wa da pynjooh sikai na warim. Chooh chooh leh kam u bru ka sorkar watoh u pait ya ka chnat krehkam yong i pynneh pynsah yei man kyrpang ka jaitbru, da kular u wa dei yakrehlang wa u Kyrmen Shylla kam uwa mihkhmat ka thaaiñ Khliehriat yooluti wow ye u wanrah ki laad yarap ya kani ka Seinkur neibynta wow ye chooh chooh u pynmiat pynbha pynphooh pynphieñ ya kani ka Chaad Pastieh.
