Ka Laskein Block Badminton Association (LBBA) da pynman ko ya ka lympung 1st Open Badminton Championship 2022 ha ka 16 tarik uni u bnai ha Seiñtyllilang Auditorium Hall, Shangpung Pohchnong.
Ha kani ka lympung da wan chimbynta da ki 82 ngut ki ha ki kyrdan waphær waphær na kylleiñ ka District.
Heipor wa sdang ya kani ka lympung da em ka yalang heiwa u BDO ka Laskein Block, u Dr. Brightstar Langbang da man u kam u kongsan hei emlang u Dr. H. Niang uwa man leh u National Umpire, Badminton Association of India, kiwa kikaam ka LBBA wa kiwi kiwi.
U Dr. Langbang hawa e yei klam da yaroh u ya kiwa kitkaam ka LBBA kiwa da pynman ya kani ka lympung kawa nyngkong dooh heiwa da wan chimbynta da ki khynnah wa ki waheh na ki chong waphær waphær ka District.
Da kyntu u leh ya ka seiñ ym du wow pynman ko ya kam kini ki lympung tangwa wow pynku leh ya i sap ki khynnah ha kani ka jait yalehke deiwa kitbok leh ya ka seiñ wow chimbynta ko ha kiwa boon tylli kam kini ki lympung khnang wow ye u lai yakhun chadooh cha kiwi ki jylla ka ri kamjooh ka pyrthai.
Kiwi kiwa da klam ha kani ka sngi kynthup ki ya u R.D Sungoh, President ka LBBA, u T.D Suiam, General Secretary ka seiñ wa na u Leadingstar Niang, Chairman ka Tournament Committee.
