Ka Nangbah Pohshnong Cultural Association, da pynman ko ya ka yaphet Marathon yong ki khynnah khian kiwa nadooh 7 snem i rta chajrong wa kiwa 12 snem chapoh kam chibynta wow kynmoo burom ya ka Vijay Divas, kawa da pynman da ka My Bharat, Mera Yuva Bharat, Jowai, West Jaiñtia Hills District.
Ha kani ka yaphet Marathon kawa da pynman ha ka 16 tarik uni u bnai da wan chimbynta kamwa 50 ngut ki khynnah kynthai wa chynrang kawa da sdang nadooh Le-Lad Lum Pyrdi wei da pynkut ha Le-Lad Wahiong Dhar (Tre Saphoh).
Hadien wa kut i yaphet, da pynman yei pynkhooid dong wei da pynman ya ka yalang pynkut ha yung skur SSA Wahiong Dhar deiwa emlang ki dkhot yong ka seiñ, ki waheh na ki dong waphær waphær deiwa sakhilang ki paidbah wa kiwa chong chnong.
Da pynlai ya ka yalang da u President ka seiñ, u Teibor Ksoo wei da klam pdiang burom da u Starwell Padit, u dkhot ka seiñ.
Hawa e yei klam wa tbian, u General Secretary, u Pynshngaiñ Pasi da ong u wa ya kani ka seiñ da seiñ ya ka ha ka yurim wa kammon u pynneh pynsah wei u pynkhlan ya ka yurim u manchwa longchwa, ha i jooh i por leh wa kammon wow pynku yia ki khon kKhynroo khyllood kamjooh ya ki khynnah kiwa dang sdang u khai khynroo ka dong ka thaaiñ lyngba ki kaam waphær waphær kam ha ki Sport, ka thaiñ ka wet, ka put ka tem wa kiwi kiwi khnang yow lait ki nei chah yahbakla ha ki kaam wym man.
Ka Resource Person, ka Daknishwa Pasi da khana ko yei thong ka Vijay Divas kawa yatoh wa ki kaam jop thma wei yaleh laitlooid deiwa kynmoo burom ya kiwa chlur mynsien wei kiwa da e yei mynsien hawa yaleh yeini. Da jied ya ka 16 tarik u bnai December neibhah toh ka sngi wa jop ka India ya ka thma pyrchah ya ka Pakistan kawa da yaleh 13 sngi heiwa da pynlaitlooid ya ka Bangladesh.
Da e khublei ko leh ya ka Nangbah Pohshnong Cultural Association yei kreh chitom ko wow pynman ya kani ka lehkmen wei wow kreh chitom chooh chooh ya kam kini ki bynta khnang wa ki khynnah u yoh ki u tip ya iwa boon iwa thymme.
Da yoh leh ya ki kyntien sneiñ na u M. Biam, General Secretary ka Seiñ Raij Nangbah uwa da pynchlur ya ki khynnah wow man ki kiwa kreh chitom.
Kiwa jop ha kani ka yaphet neiliang ki kynthai:
1st Ka Wakadarisa Lyngdoh
2nd Ka Nika Ksoo
3rd Ka Destiny Susngi
Kiwa jop neiliang ki chynrang:
1st U Ramkhian Pasi
2nd U Pynshkem Ksoo
3rd U Lastborn Dhar
Ya ki kyntien khublei da yoh na u Deimon Garod.
Ka khubor wa da pynlait da u Publicity Secretary, u Sambor Dhar.
Discussion about this post