Kam chibynta wow pynyachem ya ki warep wa kiwa thied, wa pynlai yaw kiwa em hapoh ka ri kamjooh kiwa chalan mar cha baar ri, ka Directorate of Horticulture, Meghalaya deiwa kyrchaan ka APEDA da pynman ko yaka Export Promotion Conference-cum-Buyer Seller Meet ynne ka sngi ha State Convention Centre, Shillong. Ha kani ka yachemlang da wan wow ya chimbynta da kiwa thied na kiwa boon ki bynta ka ri, kiwa chlan mar wa ki warep ka jylla.
U kongsan, u Principal Secretary ka sorkar Meghalaya, Agriculture and Farmers Welfare Department, u Dr. P. Shakil Ahammed da ong wa kam kani ka rynsan yachem kiwa dai wa kiwa thied daw ye ko wow pynyatoh lok wei pynyatipmit hapyrdi kini ki arliang kawa daw yarap leh wow pynyoh yei dor wa biang.
Da ong u leh wa ka sorkar da sdang ko ya kiwa boon ki Scheme yow yarap ya kiwa thied kamjooh ya ki warep wow pynpoi ya ki mar yong ki cha waroh ki thaw wa thmu ki. Ka sorkar da jied ko wow pynbha ya iwi i thaw neibynta uwi u mar kam ha Ri Bhoi u man ko kam ka District u satrooiñ, West Khasi Hills ya u syiñ, South West Khasi Hills neibynta i umngap katwa yaka South Garo Hills ya u sachram. Deiwa leh kamni daw suk wow chem kiwa thied ya ki warep wa ki mar wa kwah ki.
Da yooluti u wa ini i yachem lang ynne ka sngi ym kut i du ini i chisien donhi wei daw pteiñ i wow wanrah yei ya krehlang wa jrong neini chakhmat.
Kiwi de kiwa klam ha kani ka sngi toh ka Sunita Rai, Assistant Manager, APEDA, Ministry of Commerce & Industry, Government of India kawa da e ya ki kyntien hajrong ka phang pyrdi katwa ka S Nongbet, Director of Horticulture da e ko ya i ki kyntien pdiang sñiawbha wei da yoh ya ki kyntien e khublei naka L. Kharkrang.
