Jowai: Ka Lasanki Mallang kawa man kam ka Dietitian haka Children Hospital Shillong hawa bichaar ya ka yakob chet baam tynre kawa da pynman ha chnong Khonglah ynne ka sngi, da ong ko wa i rukom baam tynre leh biang hi neibynta i chait i khiah. Ki baam tynre e ki leh ya katæ ka Balance Diet næ i baam wa biang yow tei yei doh i pran yong u bru.
Ka yakob chet baam tyre da pynman daka Society for Urban and Rural Empowerment (SURE) deilang waka North East Slow Food and Agro-biodiversity Society (NESFAS) kawa da chimbyna 10 ngut kiwa chet baam tynre kiwa naka chnong. Ha kani ka yakob chet, da pynemkaam du da ki baam wa yoh napoh ka chnong hi wei kiwa chet ya boon jait ki baam.
Ka Mallang da ong ko wa hawa bichaar bniah, da chem wa iwi pa iwi i baam wa da pynkhreh da kiwa chet, da em ki jait baam kam ki kynja badam, ki kynja chyieñ, ki symbe, ki kynja khoo, ki jhoor, ka pylleiñ, ki chyieñ rymbai, ki motor, u dai wa ki sla yirngam.
Ka Pasqua Lamare kawa da yarap wow bichaar ya ka yakob chet, da ong ko hanla ym em kawi leh wa chet da kiwa kynja doh, tangwa ki baam man ki kiwa bang, ym kynmoo hi wa ym em doh wei kiwa bang.
Ki jhoor kiwa da pynemkaam hawa pynkhreh, kynthup ya ka wang, ki jhoor khloo kam ka jia harew, ka pading, ka pachor, sohpanui, chiahkui, hukea chlai, ki sohjaw, ki sapdok, tungtoh, tungtap, i ktung, ka pylleiñ wa kiwi kiwi.
Haka yakob da yoh nyngkong ka Enrichetta Liting kawa chet da ka pading, kawa ar ka Therina Sumer kawa chet ya i jhur wang wa i tungtoh, wei ya iwa le da yoh ka Cathlen Khynriem kawa chet da ka pachor wa u dai.
U H.H. Mohrmen hawa e yei klam yong oo, da yaroh u yei boonjait ki baam wei da kyntu u ya kiwa chet wa toh u man ki kiwa sarong ya jar jiar i baam. Da e yumut u leh wa neidaw wa ka chnong Khonglah da em ko haka luti wow lai cha Kudengrim kawa toh kawi na ki thaw uiñke suwari kawa pawnaam katni, emkaam ya ki wow sdang da ki dukan baam tynre ya kiwa uiñke suwari yow yoh ki wow maad yei baam tynre. Wei kamwa yoo, ki baam tynre man ki kiwa pahooh ha kani ka chnong.
Kiwi de kiwa klam ha kani ka yalang toh ka Coriniki Slong kawa klam neiliang yong ka SURE.