Shillong: U Montri wa pait yaka puræ puthi ha ka jylla, u Lahkmen Rymbui da pynsñiaw u yei phylla hadien wa yoh yutip wa ka National Council for Teachers Education NCTE ym chah de ko wow thap khynnah puræ ha College of Teachers’ Education (CTE) kawa em ha Rongkhon, West Garo Hills, neibynta u snem 2020-21, wei ha ka 18 tarik uni u bnai da phah u da i thoh cha u Montri ka sorkar pyrdi wa pait ya ka Human Resource Development (HRD) wow pyndam noh ya katai ka rai yong ka NCTE neibhah wa neiliang katai ka College da pynbiang ya iwa emkaam katkam ki kyndon wa da booh.
Ka National Council for Teachers Education ha u Thohlakhmi (Feb) uni u snem, da phah khang chwa ko ya ka College of Teachers’ Education kawa em ha Rongkhon, deiwa phah wow pynbiang ya kiwa emkaam katkam ki kyndon wa da booh, khnang wa katai ka thaw puræ kiwa hikai u yohlaad ki wow pteiñ ya i puræ B.Ed.
U Rymbui da ong u wa toh iwa sakhiat wa ka NCTE da khang chwa ko ya i puræ B.Ed ha katai ka College, wei da e laad leh 60 sngi ya ka College wow pynche, wei neiliang u Principal ka College ha ka 23 tarik u Wisu (March) da pynche u, tangwa hadooh kattæ ym pu yoh ya i rai hajrong i pynche yong ka College.