Jowai: Ka 22 tarik u Thohlakhmi toh ka sngi wa kyrpang yong ka Scouts- Guides Movement ha chityllup ka pyrthai ya kawa datip kam ka World Brotherhood Day neiliang ki Scouts næ ki chynrang wa ka Thinking Day won neiliang ki Guides næ ki kynthai.
Ha West Jaiñtia Hills District hei pait i pynlai ka District Association yong ka Bharat Scouts & Guides yei leh burom da pynman ha yung krehkaam deiwa em ka yachemlang wa kyrpang hapyrdi ki Scouts-Guides, Rovers-Rangers, Scout master wa ki Guides Captain.
Ha ka yalang wa tbian yong ini i leh burom, u Ohiwot Laloo, District Secretary, MBS&G, West Jaiñtia Hills da yahkhmat u wow e i klam i khana chaphang ka thong yong kani ka sngi hapoh ka Scouts-Guides Movement wei da pynsñiaw u leh chaphang i parom wa tbian u Lord Baden Powell wa ka Agnes Baden Powell kiwa man ki chipayu wa sdang ya ka Scouting wa ka Guiding.
Chooh chooh leh u Ohiwot ha ka thong yong kani ka sngi wa ong “World Brotherhood Day & Thinking Day”. Da ong u wa kani ka yachemlang kamni toh wow wanrah yeitæ i sñiaw yaman iwi da ka luti yong i ya burom kylliang wei sñiaw chipayu wei kamjooh leh u yaklam yaphyllu yumut wei u pyrkhat i ya ki kaam wa yatoh wei miat i bha ka imlang sahlang.
U Ohiwot Laloo chooh chooh ong u leh wa ya ka Scouts Movement da sdang da u Lord Baden Powell ha u snem 1907 katwa ya ka Girl Guides Movement won da sdang da ka diah kynthai yong O ka Agnes Baden Powell ha u snem 1910.
Kiwi won ki dkhot ka Movement kiwa da chimbynta wow e kyntien heiyatoh wa kani ka sngi toh u Adiam-u-Bthuh, Jt. District Secretary, MBS&G, Elvis Dkhar, District Organiser (S), ka Chwadaka Laloo, Asst. Commissioner (Guides) wa ka Carolina Pakma, Asst. District Orgainser (G) West Jaintia Hills District.
Discussion about this post