Ka Seng Samla Catholic Balang Mihmyntdu, Jowai Parish chirup waka Jingiaseng Samla Balang Presbyterian Mihmyntdu hapoh i yah luti ka Ai-Jingim, ynnin ka sngi da pynman ki yei e snaam sñiawbha cha ka Blood Bank Jowai kawa da pynman ha RCLP Hall Mihmyntdu.
Chwa wow sdang i e snaam sñiawbha da em ka yalang tbian yow pynsñiawthooh hajrong i kordor i snaam wa da emlang nadooh u Fr. H. Lamare Parish Priest, u Waheh Chnong ka Mihmyntdu, u A. Phawa, ka Dr. P. Shylla, In-Charge Civil Blood Bank Jowai, u Octomewot Lamin, Nominated MDC, kiwa mihkhmat naka Ai-Jingim wa kiwi.
Ka Dr. P. Shylla hawa klam ong ko hei man bru boon ki jait yarap wa ye u leh ya ki para bru wa emkaam yarap la dei poisa, ki that ki nep wa kiwi, tangwa napyrdi kini ka snaam toh kawa kongsan tam neibhah toh kawa ye u pynim yei mynsien bru.
Da pyntip haroh ko wa ki 16 sngi nadooh ka 17 tarik u Naikhynde hadooh ka 2 tarik u Naichiphaw ha waroh kawi ka India da kynmoo burom ki yaka Sewa Pakhwada, wei ka Blood Bank ha Jowai leh chimbynta ko deiwa pynman yaka Voluntary Blood Donation Drive.
Da pynsñiaw ko leh yei kmen wa em kini Voluntary Blood Donors næ ki bru wa sbun wow e sñiawbha yei snaam, lym kamtæ ka Blood Bank man ko kawa thylli.
Heijooh i por yaroh wei e mynsien haroh ko ya kiwa jooh wan chakhmat u e snaam sñiawbha kamjooh leh ya kini ar seiñ ha kani ka sngi neibhah da man ki kiwa ye u pynim ya ki para bru.
U Octomewot Lamin won hawa klam da yaroh u yaki khon khynroo ki ar balang kiwa da chim ya kam kani ka luti wow kdaar yaki laad yarap cha ka imlang sahlang, iwa mut wa i kaam yong ki ym em kut du hapoh ki soo kynroh wow pyndep yei kaam niam, tangwa da chim ki ka laad u yarap yaki para bru wot ki wym tipmit leh haka imlang sahlang.
Da booh u leh i kyntu wow pteiñ bait ki ya kani ka kaam haki snem wa chakhmat.
Ha kani ka sngi hadien wa da sylli bniah yei man i long kamjooh i chait i khiah kitu kiwa da wan chakhmat wa em mynsien wow e snam sñiawbha du 7 ngut donhi kiwa ye u e snaam.
Discussion about this post