Ki khon khynroo khyllood Catholic kiwa chong wa sah, wa lai puræ kamjooh kiwa khih wa kreh ha ka kylleiñ ka nongbah Guwahati wa em hapoh ka Khasi Jaintia Catholic Community Guwahati da pynman ki ya ka yachemlang wa nyngkong kawa tip kam ka 1st Annual Get-Together & Fresher’s Meet ha SFS Shrine Narengi Guwahati hapoh i yahkhmat u Raimanki Khonglah kam u President.
Ha kani ka yachemlang da pynman ya ka Mass Wakhooid lyngba ka ngooh ka dem da u Fr. George Thomas, MSFS Provincial Guwahati ha ryngkat i pynkupbor ya kiwa kitkaam wa thymme deilang i synranlang u Fr. Genes Shangpliang, Parish Priest ka Narengi, u Fr. Anthony Kattathara kam u Spiritual Director, u Fr. Cletus Sebastian SDB, Regional Youth Director ryngkat wa ki Sisters, ki Brothers, kiwa chah khut sñiawbha wa ki khon khynroo khyllood kiwa dapoi palat 340 ngut.
Ha kani ka sngi da wan wow sakhilang da u Kyrmen Shylla, MLA ka Khliehriat kam u kongsan wa u Wellson Siangshai, President ka Jowai Diocese Catholic Youth Movement (JDCYM) kam u Special Guest.
Hei klam kam u kongsan da yaroh u ya kiwa kitkaam ka KJCC Guwahati kiwa pynman ya kam kani ka yachemlang, u pynlum pynlang ya ki para khynroo khyllood yong ka Khasi Jaiñtia deiwa booh hakhmat ya u Blai, yow yatylli, u yarap kylliang uwi ya uwi kamjooh u kiar na ki kaam wasih kaam roi wa boonjait ha kam kani ka juk khamtam hawa im cha jngai na ka yung ka sem.
Ha kani ka sngi da pynkupburom leh ya ki khon khynroo khyllood kiwa wan chakhmat ha ka puræ puthi yong ki kam ka dak i pynchlur ya ki.
Da pynchongkun chooh chooh ya kani ka yachemlang dei chaad i rwai, ka Skit na kiwa puræ puthi ha ki University waphær waphær ha ka jylla Assam.
Da pynkut ya kani ka sngi da ka Jam Session lyngba i put i tem, i chaad i kmen wa da wan pynchongchit da u DJ Ryan wei da pynbood sa i klam e khublei sñiawngooh na ka Secretary, ka Daffnie M Mawrie.
Ya kani ka yachemlang da pynman ha ka 8 tarik uni u bnai.
Discussion about this post