Jowai: Ka Meghalaya Pradesh Mahila Congress (MPMC) ynne ka sngi da pynman ko yei yakhih pyrchah yei ku dor i phniang hapoh ka ri, ha Congress Bhavan, Shillong heiwa ki dkhot Mahila Congress kbai wei da rah ki da ki kot rben kiwa da thoh ya ki kyntien wow pyrchah ya ka sorkar NDA wa yahkhmat da ka BJP.
Ha ki kot rben da thoh ya ki kyntien “The voice of the poor will reverberate across India…No more…No More”, “Is the petrol and diesel hike to favour Modi’s favourite business houses? We need answers”, wa “We condemn price rise”, wa kiwi kiwi.
Neiliang ka President ka Mahila Congress ka Joplin Scot Shylla da ong ko wa u montri rangbah dooh ka ri, u Narendra Modi da tyngkheiñ lut u ya waroh ki kular kiwa da wanrah ya oo hei bor ha u 2014.
Ka BJP ha u 2014 da kular ko ya ki paidbah wa daw poi katæ ka “acche din” (sngi wa miat) lada wan ko hei bor.
“U Narendra Modi da lute u ya ka ri India, wei da tyngkheiñ u ya waroh ki kular ki yong oo. Hadien wa tynyap ya ka poisa kot (Demonetisation) iyi wa jia wa ka poisa tooh wa kular u? Da kylli ka Shylla.
Ka heh ka Mahila Congress da kdaw ko leh wa ka sorkar dai ko yei petrol cha ki ri kam ka England wa Australia ha i dor T. 37 chi litre tangwa hapoh ka ri India da sai T. 78-79.
Katkam i ong ka Shylla i pynku ya i dor Petrol, Diesel ki tadong LPG da ktah i ya waroh ki manyung ha waroh kawi ka jylla deiwa kdaw leh wa i pynku ya i dor i phniang kari da pynku dor i leh ya ki mar ki mata ha yaaw ha hat.
Da ong ko leh wa daw thoh ko cha u Conrad Sangma wow pynduna ya ka VAT ha ka Petrol.
Da beiñ ko leh ya ka sorkar u Modi yei wymye u wanrah yei chngaaiñ ki kynthai hapoh ka ri, neibhah kini ki kaam dang ku ki kat dang mih ki sngi.
Discussion about this post