Jowai: Kam chibynta u kynmoo ia ka World Alzheimer’s Day, ka SAN-KER Day Care Centre Jowai, ynnin ka sngi da pynman ko iaka ialang yow pynche paidbah hei iatoh i kjut Alzheimer’s Disease. Ini toh i kjut iwa ktah ia i bor i jabieñ u kynmoo ia kiwa boon jait ha ka jingim iong ki bru. Ini i kjut sdang i u ktah ia ki bru wa em 60-65 snem i rta. Boon kiwa ioh ia ini i kjut jooh bakla kiwa boon ia ki deiwa ong wa da beit tymmen ki. Ka phang wa kynmoo kyrpang ia kani ka sngi toh “Remember Me” næ Kynmoo ia nga.
Ka Dr. A. Paswet Psychiatrist Civil Hospital, Jowai, ha i klam iong ka hei iatoh wa ini i kjut da ong ko wa ini i kjut Alzheimer ne i kjut slah mylliñ jooh sdang i suki suki deiwa ktah ia i bor pyrkhat pyrdain u bru hadooh wa ia ki wa hayung hasem ki lok ki jor leh ym tipmit de ki. Kani ka kjut leh yah ko ia ki bru u klam beit, katwa dang lai i por da ktah ko ia kiwa kjut hadooh ym ye de ki u leh ia kiwa emkaam ki man ka sngi.
Neitæ ini i kjut pyndooh ko ia i bor pyrkhat kiwa kjut hadooh wa ym ye de ki u sum u sait ne tang u riam u bait.
Katkam i thooh bniah ka bor saian ympu chem tikna bha ki nei yi i daw wa mih ini i kjut. Em kiwa ioh ki deiwa hiar pateiñ na ki bei ki pa, em won kiwa ioh neidaw wa khia i jingmut jingpyrkhat ka jingim kam haka khih ka khan wa i kam yung.
U Dr. S. Syiem na SAN-KER, Shillong ong u boonsien ki bru ia kiwa ioh ia kani ka kjut jooh kheiñ wa ki da beij ki neibhah em kiwa sdang u klam 5 sien hadooh 10 sien ia i jooh. Em ki por hadooh ia ki khon ki kti ki, wa ia ki kurim leh dang mylliñ ki. Kamtæ da kyrpad u ia waroh ym hoi u dooh mynsien ki lada sdang ki u yoo ki dak ki chin ini i kjut. Toh u lai pynyoo smat ia kiwa kjut ioh u sumar ia ki chwa u joor ini i kjut. Neibhah u sumar ia ini i kjut manda slem i por toh iwa syad hadooh kattæ kattæ neidaw kiwa ioh ia ini i kjut im slem hadooh 20 snem hadien wa ioh ki ia ini i kjut, wei wa hadooh katni ym em dawai wa ye u pyncheit ia ki.
Da ioh leh i klam na ka kong J. Rymbai kawa em ka bei wa ioh ia ini i kjut deiwa ong ko wa nyngkong ka bei iong ka em ki por wa tipmit em ki por ym tipmit ko ia ki khon ko wei klam ko ia ijooh chi ijooh. Hadien da sdang ko u pyllang tiar kam wow yut ko na iung. Kamtæ kani ka kong leh da kyntu ko ia ki paidbah ym toh u yang slem ki lada em kiwa tipmit kiwa pynyoo ia ki dak wa sdang ini i kjut, toh u li thooh dawai smat ki neibhah katni ha Jwai leh ye ki u ioh iarap na ka SAN-KER Day Care kawa em ha Chutwakhu.
Ia kani ka yalang da pynman ha Yungwalieh ka Panaliar Jowai.
Discussion about this post