U Chief Minister ka Arunachal Pradesh u Pema Khandu ynnin ka sngi da pynlait paidbah u yaka e-Calendar 2021 ka Arunachal Pradesh Legislative Assembly (APLA) hei emlang u Speaker u Pasang Dorjee Sona, u Home Minister u Bamang Felix, Rajya Sabha MP Nabam Rebia, State BJP President Biyuram Wahge, ki MLA wa kiwi kiwi.
Deiwa e khublei yaka APLA wa pynmih ko yaka e-Calendar, u Chief Minister da yaroh u leh ya ini i stat pyrkhat wa yahkhmat da u Speaker wow wanrah ya i kylla deiwa thmu wow pynman yaka Arunachal Assembly kawa suk hei krehkaam.
Kani e-Calendar toh kawa nyngkong kam kani ka jait kawa pynemkaam deiwa thoh kamjooh ki dur wow khana bniah chaphang ki sngi chuti ka jylla, ka ri, ki District nakor ki sngi wa emkaam kamjooh iyi wa jia ha kiwon ki sngi, da ong u CM. Chooh chooh da ong u wa ini daw daw man ko kam ka khian dwar cha ka Arunachal yow pynyoo rong yaka dustur riti neidaw wa hapoh kani ka e-App da khana leh chaphang ki bru wa ki chnong ki thaw.
Hawa khana yei pynemkaam stat Technology hapoh ka jylla, u CM da pyntip u wa ha Arunachal Assembly da dep wow pynemkaam da ka E-Vidhan yow pynman yaka kawa ym em pynemkaam de da ki kot ki sla.
“Ym ye i wow yut naka Technology. Toh u pynemkaam i yaka yow yarap ko ya ki paidbah,” da ong u CM.
