Ka sorkar India ha ka sien wa nyngkong da pynmih ko yei pyrtuid ki ynru ngut ki chipai wa yap heipor ka Operation Sindoor, hawa dat Bomb ko ya ki ktem ki seiñ kieñ suloi ha Pakistan wa Pakistan-occupied Kashmir ha u May 2025.
Ya ki prtuid ki chipai da pynmih ha ka Roll of Honour ha ka website ka National War Memorial wei da thoh yei pyrtuid ki ha ka National War Memorial ha New Delhi.
Kini ki chipai kynthup ki ya u Subedar Major Pawan Kumar na ka Headquarters 10 Infantry Brigade; u Rifleman Sunil Kumar uwa yoh yei naam Vir Chakra na ka 4 Jammu and Kashmir Light Infantry; u Lance Naik Dinesh Kumar na ka 5 Field Regiment; u Aviation Technician Mood Muralinaik na ka 851 Light Regiment; u Havildar Sunil Kumar Singh na ka 237 Field Workshop Company wa u Sergeant Surendra Kumar uwa yoh leh ya ka Vayu Medal na ka 39 Wing.
Ya kini ki pyrtuid da pynmih ha ka Wall 3D yong ka National War Memorial hapoh ka 2025 Roll of Honour wow pynsahnaam ya ki chipai wa chakri ya ka ri.
Ka Operation Sindoor toh i sdang dat Bomb ka India ha ka 7 tarik u May 2025, ya ka ktem ki seiñ kieñ suloi kam ka tput yeiwa chah siat yap ki 26 ngut ha ka 22 tarik u April 2025 ha Pahalgam, Jammu and Kashmir.
Kini ki ktem toh yong ka Jaish-e-Mohammed wa Lashkar-e-Taiba heiwa ka India wa ka Pakistan da rai sangeh yadat ki ha ka 10 tarik u May hadien i yaklam ki Director General of Military Operations (DGMOs) ki ar ri.
Discussion about this post