Ka sorkar lyngba ka chnat i chait i khiah dang pynneh bait ko da ki jooh ki kyndon wow pynrkhiñ kyndon yada na u COVID-19 ha ka jylla hanla ha kini ki kajiak sngi da sakhi ya i boon kiwa yabi ya u khñiang khlam.
U Symbood Montri Rangbah ka jylla uwa da chimkti leh wow pait ya ka chnat i chait i khiah, u Prestone Tynsong da kyntu u ya ki paidbah wa chong chnong wow bood pynrkhiñ bha ya ki kyndon wa da phah da ka chnat wow pynduna yei yabi wei poor smat yong u khñiang khlam COVID-19 ha ka jylla.
Ha kini ki kajiak tayaw wa da dep, ka jylla Meghalaya da man ko kawi na ki jylla ha ka ri India kawa ku bha kiwa yabi ya u khñiang kjut, wei neiliang ka sorkar India leh da phah ko wow paitbniah bha yei long i man yong ka Meghalaya na u COVID-19, heiwa da phah wow em bait i pynrkhiñ katkam ka National Disaster Management Act, 2005.
Hawa yaklam ynne ka sngi, u Prestone da ong u wa ki paidbah toh u sumaar ki ya idæ wei ym toh wow mih lada ym toh iwa emkaam palat, heiwa da ong u leh wa i bood ya ki kyndon wa i deiñ Mask toh ka laad wow yada nei yabi u khñiang kjut.
