Jowai: Ka jied Waheh Chnong ka chnong Pamrapaithlu kawa pynman ha ka 1 tarik uni u bnai da mih i ood na ki paidbah wym hun ki yei rukom pyllai u Pa Dolloi ka Elaka Jowai u Puramon Kynjing yei jied Waheh Chnong.
Ka Executive Committee ka Dorbar Chnong da dep rai ko ya u kyrtong Waheh Chnong wa ya u Secretary ka Chnong wei chong ha ki paidbah won wow pynsñiaw ha ka 1 tarik wa mynjur namo ym em mynjur ki yei rai ka EC ka Dorbar Chnong.
Lada ki paidbah jied ki ya u kyrtong Secretary kam u Waheh Chnong u kyrtong Waheh Chnong haap hun u wow man kam u Secretary Chnong, wei yei jied Waheh Chnong toh ye ki kynthai wa chynrang u embynta kiwa da em 18 snem chaneiñ wei u jied deiwa rah ya ki kti.
Ha ka sngi jied Waheh Chnong u Chairman wa chi por da pyntip u ya ini waroh cha u Dolloi chwa wow e kti cha oo wow pyman u ya ka jied Waheh Chnong.
Katkam i ong kiwa chong chnong, u Dolloi da lai u cha khmat khlem da niaw wei wow chim yei soi pyrtuid kiwa chong chnong kiwa em hok u vote wei da jied ya u Waheh Chnong deiwa phah kyriaw ym toh deiwa rah kti iwa pyrchah yei rai ka EC neibhah ha ka tai ka sngi em leh ki piadbah wa wan ki wymtoh ki tre chnong wei ki leh da ye ki u kyriaw na rood na kdong.
Ha ka jied Waheh Chnong da jop u kyrtong wa jied ka EC ka Dorbar Chnong kam u Secretary wei da rem u kyrtong wa jied kam u Waheh Chnong.
Kamtæ da mih i wym hun ki paidbah wei da kyntu ki leh ya ka EC ka JHADC wow pynman biang deiwi ya kani ka jied Waheh Chnong neidaw u Dolloi ym em lai u katkam ka rai ka Dorbar Chnong.
Discussion about this post