Shillong: U montri ka sorkar jylla uwa man leh u MLA ka PDF na Mylliem, u Hamletson Dohling da pynrem joor u ya i wan thombor yong ki suba nong Bangladesh ya kiwa chong chnong ha ka thaaiñ khappood wa haap ha ka Elaka Nongtalang, West Jaiñtia Hills District.
Hawa klam wa ki laad pathai khubor u Hamlet da ong u wa man ko iyi iyi wa ym ye u pdiang wa ki bru na chiliang duriaw wow wan ki cha kani ka ri wow lute wei wow pynmynsoo ya ki paidbah, deiwa pynrap wa ki pulit wei khamtam ki chipai BSF ya kiwa da booh wow sylli ya kitai ki thaw waroh 24 kynta, yow tip kammon ki damok yoh ki wow psiah laitlan wei ya ini, ki BSF toh u jubab ki.
Da ong u wa iwa phylla wa wot u chipai BSF leh da chah pynmynsoo ha kitai ki runar, wei da kylli u leh wym ye u pynemkaam ya ka suloi kawa em u, khamtam hawa kitai ki damok toh kiwa wan psiah tooh.
Da ong u wa kani ym toh ka sien wa nyngkong, heiwa i wan lute toh nadooh ki por wa nachwa wei da pynmynsoo leh ya kiwa chong chnong.
Da ong u wa hajrong kani ka kaam daw yaklam u leh wa u montri rangbah, u Conrad K Sangma wow kyntu ya oo wow yaklam lang wa kiwa haneiñ kamjooh ya ki chipai BSF wa kam ini i jia ym toh de wow jia chooh, wei ki dkhar na Bangladesh ym toh u yoh ki wow psiah cha kani ka jylla.
Ha i jooh i por, u Hamlet da phah u yei sñiawlem cha kiwa chong chnong, khamtam cha kitu kiwa da chah thombor, da kyntu u leh ya ki paidbah ha khappood wow wan ki chakhmat wow pyntip cha ka sorkar næ cha ki bor District hanlada man ko i jia kawa khian leh.
Discussion about this post