Pynsangeh chwa u kreh yow NH- 44 Jowai-Malidor: JYF, JSU

Jowai: Ka Jaiñtia Youth Federation hapoh i yalam u President yong ka u Poipynhun Majaw wa u Rikut N. Parien u President ka Jaiñtia Students’ Union (JSU) da yachem ki ya u DC ka East Jaintia Hills wei daw yachem ki leh ya u DC ka West Jaintia Hills heiwa da pan yabor u pynsangeh chwa chipor ya i kreh ya u surok bah NH-44 Jowai-Malidor neidaw wa pynkheiñ aiñ yong ka Company wa ka National Highway Authority of India (NHAI) da ekti ko u pynkreh.

Kitai ki ar seiñ da e ki leh ya ka dorkhas cha u DC ka EJH wa kani hi ka jooh ka dorkhas daw li e cha u DC ka WJH wa cha u CEM ka JHADC ha ka sngi nyngkong ka tayaw wow wan.

Katkam katai ka dorkhas, na kitai ki ar tylli ki seiñbhalang wa paw khmat bha ha ri-loom Jaiñtia da pynsniaw ki waka Company wa pynkreh ya utai u surok lyngba ka NHAI da pynkhein ko ya ka aiñ yong ka tnad Forest ka JHADC wa ka sorkar jylla, ya ka aiñ Trading License ka JHADC wa kamjooh leh ya ka aiñ yong ka Labour Department ka sorkar jylla.

Chooh chooh ka NHAI da ong wa katai ka Company kawa dat tip pyrtuid kam ka GR Infrastructure ym pu em su ki chi ana leh ya ka bai tre khyndaw cha ki tre.

Related posts

Chah phah takit ka Scheme kular Election ka AAP, ong u Kejriwal wa tieñ ka BJP yei rem Election

December 28, 2024

Ym bien de u George wow yakhun MDC na ka Congress

December 27, 2024

Kini ki ar seiñ ha ka tai ka dorkhas wa da thoh cha ki waroh ar ki DC wa cha u CEM ka JHADC da pynsnaiw ki wa ka Company kawa pynkreh ya utai u surok ym pu em yoh Trading License ki na ka JHADC, kamjooh leh ym pu em yoh ki ya ka Work Permit nei bynta ki wa kreh na bar bylla katkam ka aiñ. Kani ka Company leh ym pu em yoh ko ya ka Forest Clearance na ka JHADC wa na ka tnad Forest ka sorkar jylla.

Kawa phylla toh wa ki bor District East Jaintia Hills da dep e bor u kreh noh ya u tai u surok lada katai ka Company wa ym pu ye ko u pynbiang ya ki kot ki sla.

Nei liang u DC ka EJH da kular u ya ki nongyalam ka JYF wa JSU wow kynjoh ktien ki yaka District Labour Department yow peit ya kani wa kamjooh leh da ong u wa hei yatoh wa ka Trading License ym ye u leh iyi iyi leh neibha wa toh i kaam yong ka JHADC.

Neiliang ki ar seiñ da ong ki wa ki bor district toh u tip ki wa kammon kreh kam ka aiñ hapoh ka Sixth Schedule Area chwa u ebor ki u kreh ka tai ka Company ya uni u surok.

Kamtea kini ki ar seiñ da dawa wa toh u pynsangeh chwa ya katai ka pynchna surok hadooh wa katai ka Company ye ko u pynbiang ya ki kot ki sla katkam ka kyndon ka aiñ.