Kiwa yaleh kreh LDA cum Typist neibynta i kreh wa da khut da ka DSC ka West Jaiñtia Hills, da yaleh mukotduma ki ha ka High Court ka Meghalaya hajrong ka yurim wa hadien wa dadep ki wow chah jied hadien wa thoh ya ka Written Exam wei da chah khut ki leh wow yaleh ya ka Local Language Paper tangwa ym em won da pyntip cha ki kammon jia hadien kani, heiwa ki Roll Number kiwa yaleh ym em mih ki heiwa ka Personal Interview da toh u pynman ha ka 01-07-26.
Kiwa yaleh mukotduma da ong ki wa ki da ye ki wow pyndep ya waroh le bynta ka yaleh kreh nadooh ka Written Exam, Typing Test wa ka Local Language Test tangwa ym em chah khut ki wow yaleh Personal Interview wei da dawa ki wow tip kammon da leh yei jied ya kiwa yaleh kreh da ka District Selection Committee.
Neiliang u muktiar ka sorkar da ong u wa katkam ka Office Memorandum kawa da pynmih ha ka 17-11-2014 da batai kammon jied kreh neibynta ki jar jiar ki kreh wa da khut heiwa ka Written Examination toh 300 Marks katkam ka Clause 4.4 wei katkam ka Clause 4.4(e) neibynta ki Lower Division Assistant da emkaam wow leh ya ka Speed Test ha ka Typing najrong ka Written Exam wa ka Interview wei lada chah jied ha ka Written Exam ym em mut wa daw chah khut wow yaleh Interview neibhah daw hap leh ka Typing Test wa ka Language Test.
Da pyntip leh wa i kreh wa lait toh 34 tylli wei da em 68 ngut kiwa chah khut wow yaleh Interview wei kiwa yaleh mukotduma toh ki wym em Qualify wei da chah ieh ki khlem chah khut katkam ka Notification wa da pynmih ha ka 15-06-26 heiwa da pynmih yei pyrtuid kiwa da chah jied, wei da yasaaid u leh wa kani ka mukotduma toh ka wym ye u yieñ.
Neiliang ka miej bichaar, u Justice H.S. Thangkhiew da ong wa kiwa yaleh mukotduma da ye ki wow pyndep ya ka Written Test deilang ka Typing Test heiwa ya ka Result da pynmih ha ka 07-05-26 wei da khut leh wow yaleh ki ya ka Language Test kawa da pynman ha ka 16-05-26, kamtæ ka yung bichaar da ong ko wa iwa thut toh wa da mih toh nei rukom kheiñ namo ka Manner of Assesment wa da leh da ka District Selection Committee neibynta ka Typing Test wa Local Language yow tip kiwon kiwa chah jied heiwa da em 68 ngut kiwa chah khut wow yaleh Interview.
Hajrong ini da ong wa i yasaaid neiliang ka sorkar ym ye ki wow pynhun ya ka yung bichaar wei da emkaam wow pynmih hukum wow pynsangeh chwa ya ka Personal Interview kawa da booh wow pynman ha ka 01-07-26 kat hadooh wa chong bichaar biang ha ka 21-07-26.
Discussion about this post