Ha ka Wyrta wa phah da u Montri ka chnat bordiñ ka jylla u James Sangma da ong wa ka sorkar jylla dang pteiñ hi ko wow yaleh yow pynbait yei rukom pynpoi wei saam bordiñ hapoh ka jylla.
Da ong u wa ka sorkar da hap ko wow pynlut chiboon wow su da ki klur tyngka cha ka NTPC katkam ka soskular yow thied bordiñ kawa tip kam ka Power Purchase Agreement (PPA), 2007. Wei hadien wa da puræ bniah ya ka soskular, ka NTPC hapoh ka PPA da paan ko wow su da ki klur tyngka hanla ka sorkrar jylla da dam noh ko wow chim yei bhah bordiñ hapoh ka PPA nadooh u snem 2015.
Da kdaw leh wa ka jylla ym em chim ko yei bhah bordiñ na ka NTPC neidaw wa syad ware i dor bordiñ bar ya iwa chim kiwi kamtæ ym em man iwa bha wow pteiñ ya kani ka PPA kawa da wanrah chooh chooh ya ka yukit wei pynlut phut ya ka jylla khlem da yoh yei myntoi.
Ha ka 15-04-21 heipor wa ka ri dang em ko hapyrdi ka la-ær wa ar ka khlam COVID-19, ka NTPC da paan ko wa toh u su ya T. 416.72 klur wei da dawa leh wa toh u su T. 294 klur pyn ha u bnai Naitung (April) hi wei lada ym su ya ini, ka chiti wa kular u su (Letter of Credit) kawa chongdor kamwa T. 18 klur wa e da ka MeECL daw pyndam noh ka chisyndon.
Hei sñiaw ka sorkar jylla, wa hadien wa su ya kani ka poisa wa sah ka NTPC ym toh de wow pteiñ ya ka PPA. Kamtæ ka sorkar jylla lyngba ka MeECL da chim ko ya ka rai wow pyndam noh ya ka PPA lyngba ka Notice wa da pynmih haka 16-04-2021.
Ka sorkar jylla leh da lai ko cha ka District Commercial Court, Shillong haka 22-04-2021 yow paan yei phah pynsangeh ya ini iwa leh ka NTPC. Kamtæ ka Commercial Court, Shillong hawa chong bichaar da u N.A. Khan, Commercial Judge, da pynmih hukum ko haka 22-04-2021 deiwa pynksan yei dawa ka sorkar jylla wei da lait yei chah pyndam ka Letter of Credit. Neiliang ka NTPC da pyrchang ko wow yaleh yow pyndam ya kani ka hukum tangwa ym em ye ko wow leh ya ini hadooh kattæ.
Ka NTPC won ha ka chithi wa phah haka 04-05-2021, da pyntip cha ka MeECL wa neidaw wym em su ya bai bordiñ, daw pynduna biang yei pynpoi bordiñ nadooh ka 11-05-2021 hapoh ka jylla Meghalaya.
Hajrong ini, u James da ong u wa kamwa man kattæ wa da joor ka khlam COVID-19, lada pynduna biang yei e bordiñ, ka jylla daw hap ko wow pyndooh bordiñ da ki boon kynta iwa daw ktah bha yei ye u yaleh pyrchah ya ka khlam COVID-19.
Kamtæ ka sorkar Meghalaya da lai biang ko hakhmat ka Commercial Court, Shillong ynne ka 7 tarik yow kypaad yow phah pyndam chwa ya ini i thmu ka NTPC wow pynduna yei e bordiñ cha ka jylla. Neiliang ka yung bichaar ynne da chong bichaar ko ya ini hanla em ka Lockdown leh heiwa da emlang ki muktiar na waroh arliang heiwa da yasaaid kamwa ar kynta heiwa ha khaddooh ka yung bichaar da rai ko wow phah pynsangeh chwa ya ini i thmu pynduna bordiñ kawa da mut wow sdang nadooh ka 11 tarik uni u bnai.
