15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynsangeh ki bor district wa ki pulit yei chah thngan ka seiñ MPUF

0 Comments
Advertisement ad1
Advertisement ad1
Advertisement ad1

Jowai : Ha ka sngi wa le ynne ka sngi yoosar ki paidbah da sdang bna ki yei chah thngan ka seiñ MPUF chirup wa ki manbei na ka chnong Nongkynrih. Ki paidbah da sdang ki wow wan cha ka dara wa chong chah thngan heiwa da wan ap ki ya i pynsñiaw ya ki nongrim wa leh ki yeini, wei da kdaw kti ki leh ya kiwa mihkhmat ka ri-loom Jaiñtia kiwa emkti ki wow kyrriah ya u Arunkumar Kembhavi kam u DC ka WJH.

Kamtæ ki paidbah da pynyoo ki yei kyrchaan deiwa wan soi pyrtuid ki ha ki register wa da booh ka seiñ, hadien ini da poi ka chithi na ka Office u DC hei pyrtuid u District Magistrate, u DM Wallang wa da pynkrehkaam ya ka 144 CrPC kawa ong wa ym em u yohbor ki u chong chah thngan heini.

Da ong ka chithi wa ha ka miet wa nyngkong wa chah thngan ki da chah khut ki cha ka Office u District Magistrate kawa pynche ya ki chaphang iwa emkaam u leh ki chwa wow chong chah thngan ki, wei da kam u wa ka MPUF ym ye ko u pynyoo ya kiwon kiwon ki kot wow pynyoo wa da yohbor ko, kamtæ da kyntu wow pyndam noh ya ini i chah thngan yong ki.

U District Magistrate da ong u wa na ki 11 ngut kiwa chah thngan kiwa wan sylli ki Doctor 10 ngut toh na ka chnong Nongkynrih kiwa em nadooh 27-68 snem i rta, kamtæ ka seiñ da booh ko yei mynsien yong ki hei ma neidaw i bor i kjam.

I kam ka MPUF wa i chah thngan wa wan ki paidbah wow kyrchaan ya ini i yakhih toh iwa thok, neibhah wa wan toh du na ka wi ka chnong, wei da ong wa da dai sarom ki ya u DC wa kam ki wa heipor wa phone ki ya oo da kular u wow ebor u ya ki hadien wa wan training u, neibhah ini ymtoh i rukom kreh yong ki bor district.

Heipor kamwa 3:30 i sngi ki bor district chirup wa ki pulit da wan phah kyrriah ki ya kiwa chah thngan wei da tympra leh ya ka dara wa chong ki hei sakhi ki paidbah.

Kamtæ hadien ini ka seiñ da rai ko wow pynman dei chah thngan mynstep i step ha madan Jrisaleiñ, Chutwakhu, Jowai hapyrdi wa lehwarom ya ka Republic Day.

Share this:
Previous

Nga u kyrtong Dolloi wa bood wa burom ya ka aiñ : Ram Rymbai

Next

File nomination ki ar ngut ki kyrtong Dolloi ka Elaka Jowai