Ka Khasi Student Union (KSU) u pteiñ ko wow booddien ya ki phang kiwa dang sahteiñ, khamtam hawa yatoh wa i dawa pynkrehkaam ya ka Inner Line Permit (ILP), i tipmit ya i ktien Khasi hapoh ka Eight Schedule, i pynbait ya u pood u ang wa kiwi neibynta i myntoi yong ka jaitbru.
U President ka KSU, u Lambokstarwell Marngar da ong u wa ka seiñ u pteiñ ko wow pyrchah leh ya ka luti rel hapoh ka jylla khlem iwon iwon i tieñ khlem randien, heiwa da ong u leh wa ka KSU u yieñ bait ko ha i liang pyrchah ya ka sorkar neibynta ka mynried yong ki jaitbru.
Da ong u wa ka KSU da lai luti ko ya ki 43 tylli ki snem, wei ha kini ki snem da maad ya i tyrha yong ka jaitbru lyngba kiwa yalam warim kiwa da seiñ yurim ya kani ka seiñ ki khynroo wa lai puræ, deiwa pynrap wa ka seiñ em ko i wow pynsñiaw cha ka sorkar wa toh u pyndep ki ya i kaam wa da kular neibynta ki paidbah, deiwa maham wa ym toh wow lehke.
Da ong u leh wa ka sorkar toh u man ko kawa khooid hawa thung kreh ha ki chnat waphær waphær, neibhah wa boon ki khynroo ym yoh kreh ki neibhah wym tipmit ki ya kiwa mihkhmat wei em leh kiwa na ki manyung wa dooh wa duk kiwa ym em bor wow pynbaam poisa.
Ka Khasi Student Union (KSU) ynne ka sngi da pynskem ko ya ka Central Executive Council wa thymme neibynta ka samoi krehkaam yong u snem 2020-23. Ha ini i pynthymme ya ka CEC da pynskem biang ya u Lambokstarwell Marngar kam u President, u Donald V. Thabah kam u General Secretary deilang wa 29 ngut kiwa yalam wa hakhmat dooh ya kiwa da pynskem deiwa pynsmai da u Micheal Syiem uwa man uwa yahkhmat warim ka KSU.
Ya ka yalang da pynlai da u Danny Khyriem, President warim ka KSU deiwa emlang kiwa yahkhmat kiwi ki seiñbhalang wa kynthup ya ka FKGJP, RBYF, HNYF wa ka HANM. Ha kani ka sngi da emlang leh kiwa mihkhmat paidbah kiwa kynthup ya ka Dr. M Ampareen Lyngdoh, MLA, u Sanbor Shullai MLA , u Adelbert Nongrum MLA, u Banteidor Lyngdoh MLA wa u Lambor Malngiang MLA.
