Pynskem ka UDP Shella da u khon u Dr. Don kam u kyrtong MLA ka Shella Constituency

Shillong: Ka United Democratic Party (UDP) Shella Circle ynne ka sngi da pynskem ko ya i pyrtuid yong u Balajied Kupar Synrem, uwa man u khon yong u Dr. Donkupar Roy wow yakhun ya ka Election chiteiñ samoi na Shella Constituency. Ya kani ka rai yong ka UDP Shella da chim ha ka yalang paidbah kawa man ha yung sah u Dr. Don ha ka chnong Saitsohpen, Sohra.

Ya i pyrtuid u Balajied Kupar Synrem da mynjur da ki paidbah kiwa da poi cha ka yalang deiwa rah kti, wei hadien kani ka pynskem na ka Shella Circle, neiliang kiwa yahkhmat ka Party daw rah ki leh ya i pyrtuid u Synrem cha ka Central Election Committee ka Party wow yoh ya i mynjur ha kini ki sngi wow wan.

Ha kani ka sngi da emlang leh u Vice-President ka UDP, u Allantry F Dkhar, u Teinwell Dkhar uwa man u CEM ka KHADC wa u MDC ka UDP na Shella, u Titosstarwell Chyne MDC ka Sohra, u Vice-President ka UDP Shella Circle, u H.M. Marbaniang ki wakreh ka Party na ki ynñiaw tylli ki Zone ka Shella Constituency, kiwa ha yung ha sem u Balajied wa kiwa kyrchaan ka UDP kiwa da poi da ki spah ngut.

Neiliang kiwa yahkhmat ka UDP Shella da pyntip u wa ka Party da phah ko ya i thoh cha ka yung yong u Dr. Don wa ha ka Zonal Committee Meeting kawa man ka yong ka UDP Shella Circle deiwa tyrwa ya i pyrtuid yong u khon u Dr. Don, wei ha ka 7 tarik uni u bnai ka yung da pdiang sñiawbha ko ya ini i rai.

Related posts

Pynbna u MP wa chah kset hapoh patok wow sdang u da ka Political Party

January 2, 2025

Da chem chitom ka UDP wow yoh kyrtong na Mawlai hadien wa mih noh u PT Sawkmie

December 31, 2024

Hawa klam ha kani ka sngi neiliang u President ka UDP East Khasi Hills District, u Titos da e u ka burom cha ka yung ka sem kawa da chah sñiawbha ya u khon wow mihsalan ha i thaw yong u pa.

U Balajied toh uwa 31 snem i rta wei da sñiaw wa da man u uwa biang wow chimkti ya kani ka kaam, deiwa ong leh wa haka kaam saiñpyrthai ka snem ym phær ko.

Ha i jooh i por u Titos da kyntu u ya ki paidbah wa ym toh u chah yah bakla ha ki liang wa yaleh pyrchah ki wow ong wa ka rta u kyrtong ka UDP man u uwa dang khynnah.

Da pyntip u leh wa u Balajied jooh e yumut ya u pa u heiyatoh wa ini wa ki kaam aiñ neibhah oo da dep puræ u ya ka MA, LLB.

Hawa klam haka yalang, u Balajied Kupar Synrem da ong u wa daw booddien u ya ki kaam wa u pa u wa da iehnoh u chiteiñ, wei ha ki 31 snem kam uwa mihkhmat u Dr. Don da leh u boon ki kaam hadooh wa kam ki khon leh ym tip de ki hadooh ka sngi wa da khlaad noh u na kani ka pyrthai.

U Synrem da ong u wa pdiang sñiawbha ya i rai yong ka Party wow yakhun ya ka Election wow wan yow kreh neibynta ka Shella Constituency. Da khut u leh ya ki paidbah wow e ki ya i krehlang ha kani ka Election wow wan wei wow emlang leh hadien ka Election.

Neiliang ka bei u Balajied, ka Rosemelyne Synrem deilang wa i khia i mynsien wa i joo umkhmat da e khublei ko ya kiwa yahkhmat ka Party UDP kiwa da yoo biang wow pynkit ha u khon ya ka kaam yong u pa.

Da pynsñiaw ko leh wa kam ka yung ym ye ki wow kyntait ya ini i tyrwa, wei ha i jooh i por neiliang ka yung ka sem da paan ki leh ya i kyrchaan na ki paidbah ya i krehlang neibynta wow pynjop emburom ya u Balajied.

Ha kani ka sngi da yoh leh ya i klam na u Allantry F Dkhar, u Teinwell Dkhar, kiwa yahkhmat ka Party ka UDP na Shella, wa kynthup na ka UDP Youth Wing, Women’s Wing wa na ki dkhot yong 6 tylli ki Zone kiwa em ha katai ka Constituency.