Jowai: Ka Party UDP ynne ka sngi da pynskhem ko ya kiwa kitkaam wa pura ka Party hapoh ka 10- Mynsngatd Khanduli Constituency haka yalang wa pynman ha Namdong-A chirup i sakhi lang ki heh ka Party wa pait yaka District waroh kawi khei emlang ki paidbah ka thaaiñ wa kiwi.
Kiwa kitkaam kynthup ya u Dawan Lyngdoh kam u President, u Abanli Siangshai kam u Vice President, u Shinningstar Shylla kam u General Secretary, Kyrshan Kshiar kam u Assistant Secretary, u Kyrmen Lyngdoh Working President, u Arki Sumer Publicity Secretary, Hopingwel Phawa kam u Adviser natlor ki 8 ngut ki dkhot ka Youth Wing waki 5 ngut ki dkhot ka Women’s Wing.
Da pynskhem ya kini waroh da u Kitboklang Nongtdu General Secretary ka Party wa pait yaka Ri-loom Jaiñtia waroh kawi chirup i emlang u President ka Youth Wing u Kynsai Bareh wa kiwi, wei da kyntu haroh ki ya ki wow man kiwa yaineh wei kreh chitom wym wow kreh du nei bynta ka Election donhi.
U Kitboklang Nongtdu hawa e u yei klam paidbah da ong u ka Party UDP toh kawa skhem yurim weiwa sñiawthooh yei eh ki paaid ri-loom, wei ong u lada pait ha kiwa boon ki thaw ka thaaiñ mihsngi ki paidbah hi rap khyruiñ ki cha ka Party ri-loom hi neibhah toh kawa sñiawthooh yei eh i kho ki tre ri ym yoh kam kiwi won ki National Party.
Da ong u leh wa ka thong hi toh yow kyntu kynrong yaka chnong ka thaw khamtam ki khynnah kynthai, wei ka kaam MDC hi wym du wow e ya ki Grant cha ki chnong ki thaw wa kiwi, tangwa emkaam u yoh da kiwa stat wa tip u chna yaka Policy khnang wa ki khynnah u em mynried ki hei thaw waki chong wa sah ki.
U Dawan Lyngdoh uwa man leh u Waheh Chnong Namdong-A uwa da em i angnood wow yakhun Election MDC ha kani ka kynti naka 10-Mynsngat Khanduli Constituency hawa e u yei klam yong oo da ong u wa nyngkong da chim chwa u ka rai samen neitæ pynsñiaw won u ha kiwa heh wow yakhun yaka MDC wei ki leh da pdiang ki ya i rai yong oo.
“I angnood yong nga wow yakhun ymtoh wa em O ya ka spah næ wada dap da biang O, tangwa neidaw wada jooh em o ha ki kaam synchaar haka imlang sahlang, yoo O wa chah ieh beiñ i ha kiwa boon ki liang, ym jooh em wa kyrchaan ya i lada em i hei eh i kho,” ong u Dawan Lyngdoh.
Kam wow pynkynmoo u Dawan Lyngdoh da man leh uwi wada paan Ticket wow yakhun MDC naka Party UDP.
Discussion about this post