Ka People’s Democratic Front (PDF) ynne ka 10 tarik da lai pynsñiaw ko heiyatoh waka Draft EIA Notification 2020 deiwa phah leh yeini deiwa thoh cha u Union Minister of MoEF&CC Government of India u Prakash Javadekar, cha u Secretary of MoEF&CC deiwa phah lang cha u Joint Secretary of MoEF&CC.
Ka Party hadien wa da dep puræ bniah wei pyrkhat yillu ko yaki kyndon ka Draft khamtam kiwa ong wow pyndam noh yaka Public Hearing namo ka pynsñiaw paidbah ya ki kattu katni ki kaam, i pynduna yei por wa e laad yaki paidbah wow e ki yei buit yong ki cha ka 20 sngi, i wym klam che ya kiwon ki jait kaam kiwa ym emkaam kamjooh kiwa lait naka Environmental Clearance, i wym che leh heiyatoh waka 6th Schedule, i suk wow pynyoh Environmental Clearance, i wym pynchitom ya kiwa tyngkheiñ yaki aiñ yada rymaw khamtam dooh i e bor yaka sorkar pyrdi wow chim yaki bor ki sorkar jylla, da ong wa emkaam wow pynsñiaw yei wym mynjur wym hun neibhah ini daw ktah ko yaka dustur riti ki jaitbru ri-loom ka jylla.
Kamtæ da ong wa boon ki kyndon kani ka Draft daw yah ko chei wym ye de wow pynkylla pynbha biang heiyatoh waka rymaw iwa daw ktah leh yei chait i khiah wei i im ki paidbah kamjooh yei mahajon ka rymaw (Biodiversity) ka jylla Meghalaya kawa man leh kam chibynta ka Indo-Burma Biodiversity Hotspot hapoh pyrthai.
Ynne ka sngi, neiliang ka People’s Democratic Front da emlang ki 4 ngut ki MLA, u Chairman wa u General Secretary kiwa da yachem wa u montri rangbah ka jylla kiwa da pynsñiaw yei sñiawkhai yow kyntu ya oo wow yaklam u waka sorkar pyrdi yow pyrkhat chwa yaka Draft EIA Notification 2020 kawa daw ktah yaki dustur riti wa i rukom im ki tre chnong ka jylla.
