Shillong: U montri rangbah ka jylla, u Conrad K Sangma deilang wa ki montri yong oo, ynne da lai yachem ki ya u Lat, u Tathagata Roy, yow kyntu ya oo yow e u yaka muhor yaka Ordinance hajrong ka Meghalaya Residents Safety and Security Act (MRSSA) wei wow pynkrehkaam yaka Administrator’s Rule hapoh ka Khasi Hills Autonomous District Council (KHADC).
“Da em wa boon ki pynche wa kwah u wei i kmen i wow pynche ya oo yeiwa artatien u wei kattu hap yang kammon u Lat sñiaw u yeini i pynche yong i,” da ong u Conrad hawa yaklam wa kiwa pathai khubor hadien wa yachem wa u Lat ha Raj Bhavan.
Katkam wa ong u Conrad, u Lat da kylli u na oo kammon wow leh ki yei wan psiah ki bru wei kiyi ki bru ki wow embynta katkam kani ka aiñ, wei lada kiwa ha yung kiwa em hapoh ka jylla leh daw hapoh ki wow Register hawa psiah chapoh ka jylla.
U Conrad da pynche u wa waroh ini daw pynbait hapoh ki Rules ka MRSSA.
“Daw hap leh boon ki ya phyllu yumut yow mih kini waroh hei rukom wa toh,” da ong u Conrad.
U Lat da kylli u leh wa lada ki aiñ sorkar pyrdi heiyatoh wa kiwa khih mylla wa ki aiñ chong chnong daw chah tyllep ki haka MRSSA heiwa u montri rangbah da jubab u wa kini ki aiñ u neh wei daw krehkaam hi ki.
“Ka MRSSA toh du chibynta donhi wei daw em leh i rukom (System) thooh yutip na ki bru kiwa psiah wei da hun u Lat ya ini,” da pyntip u Conrad.
Neiliang u Lat da ong u wa i yaklam wa u montri rangbah wa ki montri toh kawa em yumut bha.
Hawa kylli katwon u chimpor wow chim yaka rai da ong u, “Kini ym toh ki kaam khutia mutia, kini toh ki kaam wa emkaam kiwa emkaam bha chiboon i pyrkhat.”
U Lat da ong u leh wa wa u Conrad da kyrpaad u wa i por man i iwa da jhan.
“Kamtæ daw pyrkhat yeiwa ong u wei daw leh ya ini heipor wa smat katwa ye,” da ong u Lat.
Hawa kylli yei joor i dawa pynkrehkaam yaka Inner Line Permit (ILP) hapoh ka jylla, da ong u wa ini toh i rai yong ka sorkar pyrdi kamwa man yaka CAB.
Discussion about this post