Pynsñiawthooh paidbah yei yaphær ka 6th Schedule wa Article 371 yow lait u em kiwa chim kabu: Mukul

U MLA ka North Shillong, u Adelbert Nongrum ynne hapoh ka yung dorbar da kylli u na u Montri Rangbah, u Conrad Sangma wa lada em i yaklam hapoh ka sorkar jylla chaphang wow wanrah ya ka Meghalaya hapoh ka Article 371 ka Constitution ka India, heiwa u Conrad da ong u wym em kam itæ i yaklam.

U Adelbert da pynbood u deiwa ong wa 5 snem nachwa hapoh kani ka yung dorbar dadep yaklam chaphang kani ka Article 371 heiwa da em i tyrwa wow thung da ka All Party Committee yow pait yeini yow paan ka kyndon hapoh ka Article 371 neibynta ka Meghalaya.

U Conrad da jubab biang u deiwa ong wym em i chong yaklam hapoh ka jylla hajrong ka Article 371 wei ym em hi leh kam katæ ka Committee wei lada emkaam ye wow booh kam kani yow yaklam.

Da ong u leh wa kamwa man kattæ da em ka 6^th Schedule kawa em ki kyndon wow yada ya i nadooh ka riti dustur, ki thaw ki bhaw wei na ini i daw ym em sñiaw wa emkaam u pait ya ka Article 371 wei lada emkaam u yaklam ye u leh yeitæ.

Related posts

Em ki Polling Station wa jop du kawi ka Party lada ini toh iwa bakla daw hap takit ha waroh ki Polling Station: Conrad

March 6, 2025

Wanrah u Conrad ya ka mang tyngka kawa ₹1,970 klur na iwa ye u yoh

March 5, 2025

U Adelbert da kylli u wa da em ka jylla wa da pynkrehkaam ya ka Uniform Civil Code (UCC), kamtæ ym em mo pyrkhat ka sorkar wa emkaam ka kyndon hapoh ka Article 371 yow yada na kam na kani ka UCC wa kiwi de ki aiñ ka sorkar pyrdi kiwa ktah ya ka riti dustur kamjooh i hok yong i.

U Conrad da e jubab u deiwa ong wa ka 6^th Schedule em ko iwa khlan ha ka wei em leh kiwa tlot wei ini man ko i jooh neibynta ka Article 371. Da ong u leh wa hapoh ka 6^th Schedule da e bor ko wow chna aiñ, wow synchaar deilang wow bichaar tangwa ka Article 371 won ym em ko kam kini ki kyndon. Kamtæ hapoh ka 6^th Schedule da em i da ki District Council kiwa ye u chna aiñ, u synchaar wei wow bichaar.

Chooh chooh da ong u wa ka Article 371 em ko boon jait wei ymtoh iwa jooh neibynta waroh ki jylla wa em ko, heiwa ha Maharashtra wa Gujarat da booh ya ki Development Board wei kini ymtoh yow yada ya ki jaitbru næ wow yada na ki aiñ ka sorkar pyrdi.

Wei heiyatoh waka Nagaland kammon krehkaam ka Article 371, yeini ye u yaklam wei emkaam chiboon i por wow yaklam.

Heiyatoh waka UCC da ong u wa kawa pynkrehkaam hapoh ka Uttarakhand toh kawa da em ki kyndon wow pynlait ya ki jaitbru ri-loom. Wei ha Meghalaya hi ka sorkar ym pynkrehkaam ko ya ka UCC.

Hawa yaklamlang ha kani ka phang, uwa yahkhmat ka Liang Pyrchah, u Dr. Mukul Sangma da ong u wa emkaam hi wow pynsñiawthooh paidbah iyi yaphær ka 6^th Schedule waka Article 371 wei da emkaam leh kamwa man kattæ wa daw pynkylla ya ki kyndon ka 6^th Schedule, wow pynkylla ya ka Para 12 (a)(b) kawa ong wa ki aiñ ka sorkar pyrdi chong ha u Lat ka jylla wow pynlait ki napoh ki thaw wa man kam ki 6^th Schedule wei yeini e bor toh u lai noh ko cha ka sorkar jylla heithaw u Lat.

Kamtæ yow lait kani ka kaam wow man kam ka kaam Politics wa daw em wa chim kabu, da ong u wa bha wow chong yaklam chapang yong ka.