U Managing Director ka Meghalayan Medical Drugs & Services Limited, kawa man ka Company ka sorkar Meghalaya da pynche u yei mih khubor ini wa dep wa i dawai kuli Albendazole (dawai wieh) toh i wym miat wow e cha ki bru.
Da pyntip wa hadien wa pynman yei takit ya ini i dawai wa booh hapoh ka Warehouse ka jylla, da chem toh iwa da chna ha u Jan-2023 wei u kut i (Expiry Date) toh ha u Dec-2025, wei da dep phah yeini dawai cha ki District ka jylla hadien wa dep u leh yaka Certified Quality Test ha u February 2023 kamjooh leh da kiwa chna ya ini i dawai deilang waka National Accreditation Board for Testing & Calibration Laboratories (NABL) wei da chem wa ha waroh ar tylli ki Report wa ini i dawai toh iwa biang wei da chna katkam ki kyndon wa da booh.
Tangwa hadien wa yoh yaka Quality Report naka Regional Drug Testing Lab (RDTL), Assam ha u October 2023, da kdaw wa ini i dawai toh i wym em chna dei miat, kamtæ da phah syndon wow dam noh wow pynemkaam ya ini i dawa kiwa em yaka Batch No. MS4AI2301.
Hadien ini da leh biang yei Test ya ini i dawai ha u November 2023 da ka Quality Control Division ka Meghalayan Medical Drugs & Services Ltd deiwa chim nongmuna ya ini i dawai naka Warehouse ka jylla wei da phah leh cha ka Laboratory wa da tipmit da ka NABL kawa em ha Kolkata heiwa da chem wa ini i dawai toh iwa biang hi iwa da em hapoh ka jooh ka Batch No. MS4AI2301 kiwa da chna ha u Jan-2023 wei kiwa daw kut noh ha u Dec-2025.
Kamtæ deiwa Test hi hapoh ka jylla wa cha baar da chem yei jooh wa kini ki dawai toh kiwa miat wei kiwa biang wow pynemkaam wei hadooh kattæ ym em uwon uwon wa chah ktah deiwa dih ya ini i dawai.
Chooh chooh da ong wa ka sorkar chimkhia ko wow pyntikna wa ki dawa wa pynemkaam toh kiwa miat neibynta i chait i khiah ki bru.
Discussion about this post