U Lamphang ka Yung Dorbar Chna Aiñ yong ka jylla, u Metbah Lyngdoh da pyntikna u wa daw em ka kynhun takit wa laitlooid wow thooh ya i daw tre hajrong i oor i khlieh tnoom (Dome) kani ka yung dorbar wa thymme deiwa pynsñiaw yei sñiawsih wei lyngngoh hajrong ini wa jia.
U Lamphang da khana u wa neiliang ki sahep wa Engineer ka chnat PWD (Building) da lai pait ki ynne yei chna wa thymme, wei heipor janmiet da lum jhan leh ya ka yalang wa ki heh ka chnat PWD (Building), ka Company wa pynkreh deilang waka Consultant Company. Da khana u wa mynstep ka sngi daw lai pait yeitai i chna da u Montri Rangbah ka jylla yow lai deilang wa ki dkhot ka High Powered Committee.
Hawa klam cha ki laad pathai khubor, u Metbah da ong u wa hadooh katni ym pu ye u chem yei daw wa tikna hajrong itai i oor. Tangwa da ong u wa i bakla ye wow man da u Contractor lane na kiwa pynwandur (Design), deiwa pynrap wa kitu kiwa bakla toh u chim ki yei kitkhlieh.
Da ong u wa yow pteiñ yei chna yaka yung dorbar toh u em chwa ka ‘Third Party Audit’ næ kawi ka kynhun wym em chah chiliang yow pyntikna wa i kreh ym em de i chah ktah, wei da ong u leh wow chna biang kamjooh yaka toh i wym ye u man.
Hawa kylli yei oor, u Lamphang da ong u wa ym pu ye wow yoh yutip hadooh katwon i dooh-nong.
Hawa yatoh wa i pynbaad ka Congress wa da e Sub-Contract cha ka Badri Rai & Company Ltd kawa da chah kyntait ha ka Tender, u Metbah da ong u wa ym em yutip u iyi iyi leh neibhah toh iwa chong haka chnat PWD (Building) yong ka sorkar.
