Pyntipmit ka Congress ya ki kyrtong MDC cha ka JHADC wa kynthup ya ka manbei

Ka Meghalaya Pradesh Congress Committee (MPCC) ynne da pynman yalang ko ha CTC Orchid Thadlaskeiñ, West Jaiñtia Hills District wow pyntipmit ya ki kyrtong ki wow yakhun ya ka Election MDC cha ka Jaiñtia Hills Autonomous District Council (JHADC).

Ya kini ki kyrtong kiwa em 19 ngut wa kynthup ya kawi ka manbei da pyntipmit ki da u MP warim uwa man leh u President ka MPCC, u Vincent H. Pala.

Kini ki kyrtong wa ki Constituency wa daw yaleh ki man ki kamni:

U Romeo Lyngdoh na War Central

U Madonbai Rymbai na Amwi Khliehtyrshi

U Bitos Sari na Mukhla-Ummulong

U Jona Rynjah na Moodymmai Nongkhroh

U Pyrkhatbha Pyrphet na Mynsngat Khanduli

U Katbanbiang Lamare na Nartiang Wahiajer

U Richard Sing Lyngdoh na Mynso Nongjngi

U Rikut Parien na Saphai Sahsniang

U Welpard Suchiang na Raliang

U J. Treilang Suchiang na Shangpung

U Saron Paswet na Jowai South

U Yookini Phawa na Muthlong-Sohkymphor

U Siril Suja na Sutnga Nongkhlieh

U Lalwilliama Thiaite na Saipung Nongkhlieh

U Grimlang Dkhar na Narpuh

U Bashan Tangliang na Sumer

U Brosent Siangshai na Musniang Rangad

U Pynbiangmi Laloo na Mowkaiaw

Ka Banikas Laban na Barato Mukroh

Neiliang u Vincent Pala da kyntu u ya ki kyrtong wow man kiwa stat neibhah ka riti dustur em ko ha i bor ka District Council kamjooh wow wanrah myntoi ya kiwa chong chnong.

Chooh chooh da khutlang u ya waroh kiwa kyrchaan ka Congress wow kreh chitom ki wow pynjop emburom ya ka Party, deiwa kyntu ya ki kyrtong wow man kiwa sñiawkhian wei ki wow kreh ya ki paidbah.

Da ong u wa heipor yalap ym emkaam wow pynbaad ya kiwi, wow maham ya kiwon kiwon kamwa leh kiwi ki Party neibhah ki paidbah ha kani ka juk wa katni tip lut ki ya ki yurim ka Party wei man ki leh kiwa chong chnong wa stat wa tip.

Heijooh i por da ong u wa kam ka National Party ha ka rukom synchaar em ko i jooh i sur wei i kwah yong ka Party toh wow em i synchaar wa bha, wow yakreh ryngkat wa ki paidbah wei wow yada ya ka jaitbru.

Heiyatoh wa ka Election, da pyntip u wa ka Party dadep e sikai ko ya ki kyrtong ki wow yakhun MDC khnang wow tip ki kammon wow lai ha ka luti wa biang wow chakri ya ki paidbah wei katni emkaam bha wow pynkupbor ya ki kynthai.

Ha kani ka sngi da yoh leh i klam na u CEM warim ka JHADC uwa man leh u kyrtong ka Party, u MB Rymbai.