Shillong: Ka BJP ynne ka sngi da chim ko ya ka rai wow pynyeiñ kyrtong MP na Shillong tangwa ym pynyeiñ kyrtong MP ko na Tura wei u kyrchaan ya u/ka kyrtong kawa ym toh naka Congress.
Ynne ka sngi da pynbna ya u MLA ka South Shillong u Sanbor Shullai na ki 6 tylli ki pyrtuid kiwa da phah da ka State Unit ka BJP.
U Sanbor Shullai katni man u leh kam u Chairman ka Meghalaya Tourism Development Corporation (MTDC).
Na ka Tura Constituency da phah soo tylli ki pyrtuid tangwa ka Central Election Committee ka BJP da chim ko ya ka rai wow dam u yakhun na Tura.
“U kyrchaan ya u/ka kyrtong kiwa ym toh ki Congress na Tura hanlada ka Party ym chimbynta ware ko wow yalap Election wei da e bor leh ya kiwa kreh ka Party wow chimbynta ki katwa sñiawbiang ki u kyrchaan ya ki kyrtong lait noh ki kyrtong ka Congress,” da pyntip u Shibun Lyngdoh, State BJP President.
Na Tura Parliamentary Seat da yoo tikna wa i yakhun u man bait i hapyrdi u kyrtong ka Congress u Dr. Mukul Sangma waka kyrtong ka National People’s Party (NPP) ka Agatha K Sangma.
Ha Shillong, u Shullai daw yakhun u wa u MP wa da jop arsien u kyrtong ka Congress u Vincent H Pala uwa da yaleh wow jop sa ka sien wa le. Kiwi de ki kyrtong toh u kyrtong hunlang ka Meghalaya Democratic Alliance u Jemino Mawthoh, u kyrtong ka Khun Hynniewtrep National Awakening Movement u THS Bonney wa u kyrtong samen u Samuel Hashah.
U Sanbor Shullai u thap pyrtuid u ha kani ka 25 tarik kawa man leh ka sngi wa khaddooh wow thap pyrtuid.
Neiliang u State Unit President ka BJP u Shibun Lyngdoh da pynche u wa ka Party ym em ko hapoh ka MDA Forum wei man ko kawa kyrchaan du ya ki Election MLA hapoh ka jylla. Kamtæ ka BJP ye ko wow pynyeiñ kyrtong MP ha iwon iwon i thaw wa sñiaw biang ko.
Hawa kylli hadooh katwon emlaad u kyrtong ka BJP pyrchah ya u kyrtong ka Congress, u Shibun da jubab u deiwa ong wa katni da kylla i por wei ka Congress da chim kabu ko yei bor yong ka heipor wa synchaar ko tangwa katni ym em de ko hei bor sñiaw skem hi wow jop.
Discussion about this post