15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Pynyieñ ka HYC 8 tylli ki moopynyieñ neibynta ki khla wait ka ri

Advertisement ad1

Ka thaaiñ Nongthliew kawa em ha i ryngkhi u loom Diengїei toh ka raij hapoh ka Hima Nongkhlaw wei man ko kawi na ki chnong wa heh kawa em da ki hajar ki manyung mansem wa da ki phaw hajar ngut ki khon ki hajar. Ka wi na ki kyntoit wa da e pyrtuid kam ka Laitarted toh ka chnong wa miat dur bha ki loom ki wah, ki lyngkha wa ka rymaw soodong sookun.

Ka dorbar chnong da e bor ko ya ka Hynñiewtrep Youth Council (HYC), Nongthliew Circle wow booh naam ya ki khla ka wait yong ka Bri U Ynñiawtrep deiwa thung da ki moopynyieñ ha i thaw wa em rap hajrong iwa chynna bha na waroh soodong ki chnong wa marjan wei hapyrdi wow booh ya u mot u Syiem Tirot Sing.

Ha kani ka thaw da pynkhreh wow lai taan moo nadooh na chnong Kyrphei, Tyrsad na ka Hima Maharam yow rah chadooh Laitarted ryngkat ka ksiñ ka dhah wa ka rwai phawar chitrhem ya ka jaitbru.

U kongsan ha kani ka rong ka taan, i pynyieñ ya ki moopynyieñ toh u Robert June Kharjahrin, u khliehdooh yong ka HYC uwa da kyntu kynpham ya ki khynroo wow kynmoo ya ki kaam wa da leh da ki khla wait kaamjooh leh ya waroh kitu kiwa da embynta lang ki wym em tip pyrtuid neibynta wow chakri ya ka ri wa ka jaitbru yow pynlait na kiwa synchaar ya i.

Ha kani ka sngi da thung phra tylli ki moopynyieñ ha ka rynsan wa da kær kyrpang ya i thaw wow chna ya u mot yong u Syiem Tirot Sing. U Kongsan da kdaw u wa ki moopynyieñ wa da booh toh ya waroh khla wait kiwa da e yei doh wa i mynsiem yow yada ya ka khyndaw wa ki khon ki hajar kiwa kynthup ya u Syiem Bormanik yong ka Hima Shyllong, u Syiem Sngap Sing yong ka Hima Maharam, u Monbhut, u Lorshon Jaraiñ, ka Phan Nonglait wa kiwi kiwi ki bru wa chlur kiwa yakhun pyrchah ya kiwa choon.

Ya i chna ya u mot yong u Syiem Tirot Sing ha ini i thaw, ka HYC da ekti ko wow chna da ka Riti Academy uwa daw wai paidbah haka lyngkhooh sngi yap yong oo.

Share this:
Previous

Pyndam ya ka No Entry yow lait na i sahkut ki kari, ong ki ar seiñ

Next

Saam ka sorkar ya ka poisa yarap cha kiwa yoh myntoi hapoh ka Meghalaya Piggery Mission