December 22, 2020
Advertisement
Shillong: Ka Meghalaya Livestock Enterprises Advancement Society (M-LEADS) da saam ko ya ki Cheque cha ki Cooperative Society/IVCS kiwa da chah jied na ki bynta waphær waphær ka jylla hapoh ka Meghalaya Piggery Mission ha ka yalang wa pynman ynne ka sngi hapoh State Convention Centre, Shillong.
Ka wow pynkynmoo wa i thong ka Meghalaya Piggery Mission toh yow pynman ya ka jylla kawa ye u pyndap hi yei emkaam doh sniang yow pynku leh yei yoh i kot ki palat 25,000 tylli ki manyung, kamjooh yow pynskem yei dap baam, i pynkhlan leh yei ya krehlang, i e yarap poisa kamjooh yow yoh yei baam wa tei ya kiwa chong chnong ka jylla.
Hawa e yei klam ha kani ka yalang lyngba ka Video Conference, u Montri Rangbah ka jylla u Conrad K Sangma, da yaroh u ya waroh yei kreh chitom yong kiwa embynta wow mankaam ka Meghalaya Piggery Mission. Da ong u leh wa kani ka thong toh kawa emkaam bha wei ka sorkar da kreh ko neibynta ini la chi snem chiteiñ.
Da ong u leh wa em boon ka poisa wa lai cha baar ka jylla yow thied sniang, kamtæ da pynchlur u ya ki bru samen, ki Co-operative Society waka imlang sahlang wow wan ki chakhmat yow yoh myntoi naka Meghalaya Piggery Mission yow pynku ya i yoh i kot ki bru.
Neiliang u Symbood Montri Rangbah u Prestone Tynsong, hei klam yong oo da ong u wa ini toh i wow sahkynmoo yanom ya ki Co-operative Society wei da yooluti u wa da ini i yoh yarap poisa ynne ka sngi daw man ko kam kawa yarap wow pynku yei khih i khan ya kiwa yoh myntoi.
Ya ki Cheque da saam cha kiwa yoh myntoi na waroh ki 11 tylli ki District ka jylla.
Kiwi de kiwa em lang ha kani ka yalang toh u G.H.P. Raju, Principal Secretary Cooperation, Dr. Vijay Kumar D, Commissioner & Secretary Cooperation, ka W.A.M. Booth, Joint Secretary Cooperation & Chief Executive Officer, M-LEADS deilang wa kiwi kiwi.
