U Finance Minister warim ka India heipor ka sorkar NDA wa yahkhmat da u Atal Bihari Vajpayee, u Yashwant Sinha da pynbna ka liang pyrchah ya oo kam u kyrtong wow yaleh President hapoh ka ri.
Yeini da pyntip da u Jairam Ramesh u heh ka Congress ha ka yalang yong ki Party wa em ha ka liang pyrchah ka sorkar pyrdi.
U Ramesh da ong u wa ya u Yashwant da mynjur lang chi sur deiwa ya tylli waroh ki Party kiwa em ha ka liang pyrchah.
Da ong u leh wa u Yashwant hei lai luti ha kiwa boon jait wow chakri paidbah, da dep man u leh kam u Finance Minister kamjooh u Minister ka chnat External Affairs ka ri, kamtæ da ong u wa u Yashwant da man u uwa da biang bha wow ksoh ya ka yurim synchaar paidbah khlem da leh chilliang ha ka niam kamjooh ki yurim ka riti synchaar ka ri.
U Yashwant Sinha uwa man kattæ kam u Vice President ka Trinamool Congress da pynsñiaw u yei sñiawngooh ya ka Mamata Banerjee wa da e laad ko ya oo wow chim yei kaam wa neibynta ka ri waroh kawi yow kreh neibynta i yatylli.
Da pyntip leh wa daw lai thap pyrtuid ha ka 27 tarik uni u bnai.
Kam wow pynkynmoo ka tarik wow thap pyrtuid ki kyrtong yaleh President u man ko haka 29-06-22, u sylli ya ki kot ki sla toh haka 30-06-22, ka tarik wa khaddooh wow kynran dien toh haka 02-07-22, ka tarik wow thap Vote toh haka 18-07-22 katwa ka sngi wow niaw Vote toh haka 21-07-22.
