U Montri Rangbah ka jylla, u Conrad K Sangma da e dak u wow pynman kaam noh ya i dawa wow e District noh ya ka Sohra deiwa pynku kyrdan ya ka na ka Civil Sub Division cha ka District. Ya ini da pyntip da kiwa yahkhmat ka Sohra District Demand Forum hadien wa yachem wa u Montri Rangbah ynne ka sngi.
U Secretary ka Forum, u John Thabah da ong u wa i yaklam da man iwa mih soh heiwa neiliang u Montri Rangbah da e dak u wow pynman kaam noh ya ka District wei da klam che u wa ya ka Head Quarter yong ka District daw booh bait ha Sohra wei i pyrtuid yong ka u man i ka Sohra District. Da ong u wa neiliang ka Forum da paan ko leh ya i thmu næ iwa tyrwa ka sorkar neibynta ka Sohra District khnang wow ye ko wow bichaar.
Hawa kylli, da ong u wa ki chnong kiwa chah kynthup hapoh ka District thymme u em ki kamwa 200 tylli na ki 2 tylli ki Constituency ki wow kynthup ya ka Sohra wa Shella. Da ong chooh chooh u wa neiliang ka sorkar dadep pynbait ko leh ya ki kattu katni i eh i khor wow yoh ya ka District na i wym yahaap i man i long ki thaw.
Hawa kylli won wa lada ini ye i wow man du i kular Election yong ka sorkar, neiliang u John da pynsñiaw u wa ka Forum ymye ko wow klam iwon iwon lada man iwa pynbiej Election donhi, tangwa ka Forum u pteiñ ko wow dawa ya ka District hanla chimpor sa 4-5 snem leh.
