Pynyoo ki muktiar ka EJH yei yahbakla ka Shree Cement kawa ong wym em khloo em um hei thaw tih moochuni

Ki soo ngut ki muktiar ka East Jaiñtia Hills District wa kynthup ya u Dawanmon Pachiang, u Jimmy Pdang, u Federick Muliar wa u Bebulme Sympli da lai booh ujor ki ha u Member Secretary ka Meghalaya State Pollution Control Board yow pyrchah ya ka Public Hearing wa daw pynman da ka M/s Shree Cement Limited ha i thaw wa tip kam u Lum Syrman, East Jaiñtia Hills deiwa ong wa neiwa tih moochuni daw ktah ko ya ka wah Litein deilang ki khloo ki kjam wa waroh iwa em ha kani ka thaw.

Da ong wa ka thong toh wow yada ya ka wah Litein kawa da yabi wa kani ka thaw wa thmu tih moochuni neibhah lada chah u tih, ym ye de wow pynkylla deiwi nadooh i chah ktah ki dohum wa em ha ka kamjooh ki thaw rep wa em ha rood ka wah wei ini man ko kamwa pyndooh ja ki warep.

Da kdaw leh wa ka wah Letien man ko kawi kawa dang sah kam ka wah ka wym pu em chah ktah. Kamtæ da ong wa lada ym pynjngai dei wym duna ya 1 Km na u pood ka wah, ym ye u yada ya kani ka wah.

Da kdaw leh em boon iwa yahbakla ha ka EIA wa ka TOR Report wa da e heiwa da ong wym em ki um ki wah hapoh 10 Km kamjooh leh ym em Reserve Forest ha kani ka thaw tangwa em ka Saipung Reserve Forest hapoh 4 Km wei ka wah Letien pyn ha kani ka thaw.

Ya kani ka Project da booh ka hapoh ka Category B1 tangwa man ko ka Category A wei da paan Clearance na Gujarat iwa man iwa bakla.

Related posts

Napoh kari hiar u Conrad yow ap yei dawa kiwa pynman yakhih

May 1, 2026

Pynman yakhih sa ki Vocational Teacher yow dawa tulop kamwa yoh kiwi

May 1, 2026

Chooh chooh da ong leh wa pyn hapoh kani ka EIA da kdaw che wa daw ktah ya ki khloo ki kjam, ki mrad khloo wei kani ka thaw hapoh ka EIA da pynyoo toh kawa rben khloo wei kattu katni ki thaw wa sah chrah. Kani ka EIA da ong ko leh wa ye wow chah ktah ki krem wa em ha kini ki thaw.

Kini ki muktiar da kdaw ki leh ya kiwi kiwa boon wa yahbakla kani ka karkhana wei ini da man ko pyrchah ya ka aiñ. Kamtæ da dawa wow pyndam noh ya kani ka Public Hearing chisiendon, u booh ym duna ya 1 Km wow jngai na ka wah Litein, u kyntait leh ya kani ka Project neidaw wa joor ktah ko ya ka waroh ki liang hadooh ka imlang sahlang wei kam ka Pollution Board toh u leh ko yei kaamram ko wow yada ya ki loom ki wah.

Da maham leh wa lada ym leh yeini daw pynbor ya ki wow lai cha ka NGT wa cha ka Meghalaya High Court.