Ha ka yalang yalap Election u kyrtong ka NPP na 1-Nartiang Constituency, u Sniawbhalang Dhar kawa da pynman ha ka janmiet ka 31-01-2023 ha chnong Ummulong, kamwa 90 na ka 100 kiwa chong chnong da wan ki wow pynyoo yei kyrchaan wa pura ya u Sniawbhalang uwa man leh u Montri ka sorkar Meghalaya.
Ha kani ka yalang wa pynlai da u B. Pohshna, President ka NPP Ummulong Unit, da yoh leh yei klam pdiang na u Waheh Chnong ka Ummulong uwa da pynsñiaw leh ya ki kaam wa da lehbha u Sniawbhalang wei heijooh i por da kyntu u leh ya ki para chnong wym hoi u mylliñ ki ya uwa lehbha.
Ha kani ka yalang da yoh leh ya ka bui (Report) na ki 9 tylli ki Unit, ki seiñ khynroo wa ki seiñ manbei ka NPP wa em hapoh ka Ummulong heiwa da pynsñiaw wa 90 na ka 100 kiwa chong chnong da em ki neiliang u Sniawbhalang.
Neiliang u Sniawbhalang hei klam yong oo da e khublei u ya kiwa chong chnong, da pynsñiaw u leh ya ki kaam wa dadep leh, kamjooh leh da pynsñiaw u ya ki kaam wa daw leh, da kular u pynchna ya ka Gallery yong ka Mini Stadium Ummulong, u pynbha ya ka CHC, ka Children Park kawa dadep booh poisa (Sanctioned) kamwa T. 1 klur tam tangwa neidaw wa da krehkaam ka Model Code of Conduct ym ye de u pynlait ya ka poisa. Da pynsñiaw u leh wa ki surok hapoh ka chnong ki wym pu yoh psiang leh da em lut ki hapoh ka Sanction.
Hawa pynkut yei klam yong oo, da ong u wa kwah u pynman ya ka Ummulong kam ka Model Village wei wow man ka chnong wa kiwi tawan ki chnong u pait wei wow bood nongmuna ki na ka.
