Ynne ka sngi u kyrtong ka NPP na Mowkaiaw Constituency, u Habahun Dkhar da pynman u ya ka yalang wa khaddooh yong oo heiyatoh wa kani ka Election MLA deiwa pynman ya ka yalang ha Mowkaiaw wei da wan chimbynta hadooh palat 15,000 ngut ki paidbah katkam ka yukheiñ kiwa pynman ya kani ka yalang.
Ha kani ka yalang da yoh i klam na u E. Laloo uwa da ong u wa ka NPP toh kawa yahkhmat ya ka sorkar MDA wei kani ka sorkar da wanrah ko chiboon ki kaam wow myntoi ki paidbah ka jylla.
Da ong u wa i chah beiñ ka NPP toh nei adnood donhi neibhah em ki chirup wa ka NPP ha ka sorkar deiwa kdaw yei dooh tulop kiwa sikai toh u Montri ka chnat Puræ Puthi toh u Lahkmen Rymbui uwa man u UDP, i chah siat u Cherishterfield Thangkiew toh heipor u Lahkmen Rymbui uwa man Montri ki kaam pohyung wa kiwi kiwi.
U Habahun Dkhar hawa e yei klam da ong u wa i wan yong ki paidbah pynyoo ko ya i dak wa kyrchaan ki ya oo ha kani ka kynti.
Da ong u wa emkaam u skem wow poi cha ka thong i jop wei kiwa kyrchaan ka UDP wa Congress leh da wan kyrchaan ki ya oo ha kani ka kynti.
Da ong u leh wa kiwa kreh u Nehemayah Tyngkan da Phone ki oo heiwa da ong ki wa ym poi thong ki wei emkaam wow pynchkeh u yow yoh yei jop.
Ha kani ka sngi da pynphooh ya ka yalang da ki chaad wa ki rwai na ki khynnah, ki khyllood wa ki manbei.
