U MLA ka Mawhati, u Charles Marngar hapoh ka yung dorbar chna aiñ ynne ka sngi da kylli u na u Montri Rangbah ka jylla katwon tylli ki kreh ka Meghalaya wa da pynsangeh da ka sorkar Assam.
U Conrad da ong u wa em hi ki kaam wa da chah pynsangeh tangwa ki kreh wa dang lai chakhmat ha ki thaaiñ khappood leh em ki boon tylli bha heiwa da pynyoo u boon sla ki kot deiwa ong leh wa ymem ya soi soskukar wa u Montri Rangbah ka Assam wym toh u pynthut ya ki kaam pynroi katni tangwa nachwa em hi i yathoh tangwa deiwa yaklam da dep boonsien wa kiwon kiwon ki kreh ki yong ka sorkar pyrdi wa pynkreh da ki ar jylla ym toh u pynsangeh ki.
“Tangwa lada em i pynthut, ki DC yong ki ar jylla toh u ya pynbait ki, lada ym ye ki ye ki wow phah cha kiwa em hakhlieh yong ki hadooh cha ka kyrdan u Montri Rangbah,” da khana u Conrad.
U Charles da khana u wa em boon ki kreh wa da pynsangeh da ka Assam kiwa man leh kiwa emkaam bha kam ka yung krehkaam ka ICDS ha Madan Umwang, kawi ka SSA LP School wa da chah tympra da ka Assam, kawi ka kreh JJM ha Jatalong wa da pynsangeh da ka Assam wa kawi ka yung dorbar ha chnong Umru kawa da chna hapoh ka Border Area Development Scheme.
U Conrad hawa jubab da ong u wa du hapoh kawi ka thup wa em ha oo da em 51 tylli ki kreh wa dang lai chakhmat ha ki thaaiñ khappood wei na kini ha thaaiñ Umru wa ha kiwi ki thaw ha Ri-Bhoi da em du 3 tylli kiwa da hap sangeh.
Ha kawi won ka thup wa em 16 tylli ki kreh, ym em kawi leh wa da hap sangeh, wei ha kawi ka thup wa em 5 tylli ki kreh na ka chnat Fisheries, ym em kawi leh wa sangeh, ha kawi won ka thup wa em 7 tylli ki kreh lyngba ka chnat C&RD ym em kawa hap sangeh. Kawi won ka thup hapoh ka Border Area Development Scheme, da em 44 tylli kreh wei kini leh ym em chah pynsangeh.
Kamtæ da ong u wa em hi ki kattu katni kiwa chah pynsangeh tangwa kiwa boon hi toh kiwa da lai chakhmat i kreh deiwa pynrap u wa kini kiwa chah pynsangeh leh ym toh u chah pynsangeh ki wei ya kini leh hap wow pynbait yeiwa thut wei ka sorkar da kreh ko wow pynbait noh ya u pood.
Da pyntip u wa nachwa boon bha ki kreh kiwa da chah pynsangeh tangwa katni da man ki kiwa da pteiñ biang wei em ki por leh wa ki kreh yong ka Assam da chah pynsangeh ki ha kiwa chong chnong ka Meghalaya.
Hajrong ini da ong u 99% i kreh toh kiwa da lai chakhmat kamwa toh u leh ki wei da kular u leh wa u chimkhia ya kiwa chah pynsangeh wei lada tip wa em kiwa chah pynsangeh wow pyntip smat cha oo yow leh ki yeiwa emkaam.
U Marngar da ong u wa daw phah u cha u Montri Rangbah ya waroh ki kreh wa da hap pynsangeh wei da ong u leh wa na Meghalaya ym jooh em pynsangeh ko yei kreh ka Assam.
