Pyrchah joor ka HNYM West Jaiñtia yei lai ki kari kit mooyong na ka yingkieñ wa da tlot

Ka seiñ HNYM West Jaiñtia Hills da pynsñiaw ko yei pyrchah yei em ki kari wa kit mooyong pyrchah ya ka aiñ ki yong ki kattu katni ngut ki bru wym tipmit kiwa da lai luti na ka yingkieñ Myllep kawa da tlot bha wei kini ki kari toh kiwa da kit palatpood.

Ka seiñ da ong ko wa ini da booh ko hei maa ya ki dong ka thaaiñ deiwa lai kini ki kari kit mooyong pyrchah aiñ kiwa lai lyngba u sarok Raliang-Saphai ter-ter chadooh Garampani, Assam wei da chem leh wa kiwa boon kini ki kari toh ki yong ki baar jylla kiwa da lai hi-eh khlem biang ki kot ki sla kam ki Challan wa kiwi kiwi de kiwa emkaam.

Neiliang ka seiñ da pyntip ko wa da yaklam wa u SP ka West Jaiñtia Hills, u Chemphang Syrti wei da kular u wow chimkhia ya ini i kaam tangwa hadooh katni da em bait ki kari wa lai na kani ka yingkieñ.

Kamtæ da kyrpaad ya ka sorkar wa toh u leh ko iyi iyi hajrong ini wei lada ka sorkar kwah ko wow pynlai ya ki kari kiwa kit mooyong lyngba uni u sarok, ka seiñ da dawa ko na ka sorkar wow pynyoh ya ka yingkieñ kawa skem khnang wym mih i maa ya u paidbah ka thaaiñ Laskein Block.