Jowai : Ka seiñ Meghalaya People’s United Front pynsñiaw ko yei chrai wei mynsien wa khia hajrong i thmu yong ki kattu katni kiwa kwah myntoi samen kiwa kwah u kyrriah kaam (transfer) ya u Deputy Commissioner ka West Jaiñtia Hills District neibhah wym man u kam kiwi hieh wei wow pyndem ha khmat yong ki wa mihkhmat wei man u leh u bru uwa smat bha u krehkaam lada wyrchaw na kiwa boon.
“Lada kyruiñ chadien na kiwa boon hi ki DC ki wa da lai da wan na ka district, yang ki du wow kut noh hi por katwa uni u DC uwa katni yoh u sakhi chiboon ki myntoi wow wanrah u, neibhah du hapoh chi snem ar bnai da kreh u, i kam ki seiñbhalang da yoo i yei pynkreh nadooh ka yingkieñ Kureliya kawa da sah da boon snem, ki kaam ka municipal næ ki rukom krehkaam ka District Selection Committee(DSC) yoo i wa uni u DC man u uwa biang bha na waroh” da ong u President ka MPUF u D. Laloo.
Ka seiñ da pynsñiaw ko yei wa lyngoh ko wa em kiwa kwah syndet hieh u kyrriah kaam ya oo du neidaw yow myntoi samen ki.
Chooh chooh ka seiñ da ong ko wa lyngba uni u DC da yoh ka district ya ka multi crore project na ka Ministry of New and Renewable Energy kawa kynjoh hadooh T. 6.04 klur kawa kiwa kwah myntoi samen ym yoo ki yeini.
Kamtæ ka seiñ MPUF kyntu ko wa ka sorkar ymtoh u kyrriah kaam ko ya uni u DC neibynta i roi i paar ka district hi waroh kawi.
Discussion about this post