Ka MP ka Tura, ka Agatha Sangma da thoh ko cha u Montri Rangbahdooh ka ri, u Narendra Modi yow pynsñiaw yei pyrchah ya ka National Mission on Edible Oil-Oil Palm (NMEO-OP) kawa da booh kyrpang ya ka poisa wa T. 11,040 klur yow pynduna yei wanrah na baar ri ya i phñiang baam Palm Oil.
Da ong ko wa ini i thmu toh iwa bha tangwa da khuslai ko yei rukom pynkrehkaam ya kani ka Mission khamtam hawa thung ya uni u jait dieñ wa pynmih phniang khamtam ha ka thaaiñ Northeast wa ha ki Andaman Islands kiwa man ki thaw wa mahajon ki spah ka rymaw wei kiwa ye bha u chah ktah deiwa suk lada sdang wow thung ya ki dieñ Palm heiwa daw hap thwat ya kiwa boon ki khloo iwa daw pyndooh leh yei thaw sah, thaw rieh ki mrad khloo.
Da kdaw ko leh wa u jait dieñ Palm ym toh uwa em cha ka thaaiñ North East wei lada sdang wow thung sa ya kam kini ki dieñ wa na baar ri kiwa emkaam um chiboon daw ktah ko hadooh wym ye de u pynkylla kamjooh leh ya ka um wa kai napoh khyndaw.
Chooh chooh da ong wa ka thaaiñ Northeast toh kawa em ki jaitbru wa boon jait kamjooh ki dustur riti kiwa phær wphær kamjooh i rukom mantre ya ki thaw ki bhaw leh phær ko wei man ko leh kawa duna bru bha hawa nujor wa kiwi ki bynta ka ri India. Kamtæ lada sdang wow thung ya uni u dieñ, daw dooh wow pynemkaam ya ki thaw ki bhaw kamwa jooh leh iwa daw ktah kylla ya ka imlang sahlang.
Hajrong ini waroh, neiliang ka Agatha da ong ko wa da pyrchah ko ya ka NMEO-OP neibynta ka thaaiñ Northeast deiwa kyrpaad leh wow yaklam chwa wa kiwa daw chah ktah chwa wow lai chakhmat ya ini i kaam.
