Ka BJP da yieñ skem ko wa man pyrchah ko ya kiwon kiwon ki jait kaam baam tooh wei ini ym em kylla i hadooh katni, da ong u BJP National Secretary, u Rituraj Sinha ynne ha Shillong.
Da ong u leh wa BJP ngait ko wa kiwon kiwon ki jait kaam baam tooh man ki i kjut ha ki kaam synchaar paidbah, wei da man i leh u moochynthut yei bha i miat ki paidbah. “Ka BJP toh kawa pyrchah yei baam tooh, pyrchah yei synchaar da kiwon kiwon ki manyung wa ki bru wa man pyrchah ya ka ri”, da ong u Sinha.
Yeini da ong u Sinha hadien wa u Home Minister ka ri, u Amit Shah da pynbaad u wa ka Meghalaya toh kawi na ki jylla wa baam tooh dooh hapoh ka ri heipor wa wan yalap Election u ha Tura ha ka 17 tarik u Thohlakhmi.
Tangwa u Sinha da ong u wa katni wa da kut ka Election, da toh i por ya ka sorkar pyrdi waka sorkar jylla wow krehkaam ki yow pynyoh ya ka sorkar wa skem hapoh Meghalaya.
Da kdaw u leh wa ka Meghalaya em ko boon i tkoh wa ktah yei roi i paar, ki kaam poisa poilaiñ wei toh i bynta ka sorkar pyrdi waka sorkar jylla wow ya krehlang ki yow chem ki laad ki luti wow yarap ya ki paidbah wei ini toh i thong ka BJP hapoh ka jylla.
Hawa kylli won yei ye ka BJP wow jop du arngut donhi ki MLA hanla da pynyieñ ko ha waroh ki Constituency, wei da wan wot wa u Prime Minister ka ri wow yalap Election, u Sinha da ong u wa ka Party da leh ko yeiwa ye dooh ko yow pynyoo cha ki paidbah da kawi ka laad synchaar wei hei khaddooh chong hei rai ki paidbah.
Haiyatoh won wa i wym bien ki paidbah wow pdiang ya ka BJP, u Sinha da ong u wa daw hap wow pynkhlan chooh chooh ya ka Party tangwa da heh da san ko hawa nujor ha u snem 2018 wei daw hap pyrkhat yeiwa da jia ha kani ka Election wa dang dep.
