theme-sticky-logo-alt
theme-logo-alt
Advertisement ad1
Advertisement ad1

Pyrchah ka China yei wan u Vice President ka India cha Arunachal Pradesh

Advertisement ad1
Advertisement ad1

Ka China ynnin ka sngi da boh ko yei wan u Vice President ka ri u Venkaiah Naidu cha Arunachal Pradesh, deiwa pyrchah skem yei lai uni u heh ka India neidaw wym jooh em tipmit ka China ya kani ka jylla.

U Naidu da lai u cha Arunachal Pradesh ha ka 9 tarik uni u bnai yow lai e yei klam wa kyrpang hapoh ka yung dorbar chna aiñ ka jylla heiwa da ong u da chynna bha yei kylla dur ka thaaiñ Northeast iwa man i sabut wa da ku da paar kani ka thaaiñ kawa da chah ieh mylliñ da ki phaw snem.

Ka China kamwa jooh myllien ko, kut u wan ki heh ka India cha Arunachal Pradesh da pynyoo bait ko ya i yurim wa yieñ ko wa heiyatoh wa kani ka jylla.

Ka India hawa e yei jubab da ong ko wa ka Arunachal Pradesh toh ka bynta yong ka India wei ki heh ka ri yei ki wow lai cha ka kamwa lai ki cha kiwi ki bynta ka ri leh.

U pood wa kajia ka India-China toh uwa jrong 3,488 Km uwa tip kam u Line of Actual Control (LAC). Ka China da kam ko ya ka Arunachal Pradesh kam ka South Tibet.

Ka China neiliang u Foreign Ministry, u Zhao Lijian da ong u wa ka China ym jooh em tipmit ko ya wa em kam katæ ka jylla Arunachal kawa da chna da ka India pyrchah ya ka aiñ kamtæ da pyrchah ko ya ini i wan u heh ka ri India.

Da kyntu u leh ya ka India wow burom ya ini i sñiaw ka China wym toh u kynaad ya kani ka kaam khappood iwa ye u pynthut yei ya sñiawthooh hapyrdi ki ar ri.

Chooh chooh da ong wa toh u leh ka India ya ki kaam wow wanrah yei suk ha ki thaw khappood wei wow wanrah leh yei yaklam waroh arliang.

Kam wow pynkynmoo wa ini wa dep da sahkut i yaklam hapyrdi ki ar ri hawa yatoh wa u Line of Actual Control (LAC) ha ki bynta mihsngi ka Ladakh wei da neh la 17 bnai i ya yang waroh ar ri ha ki khappood ka Ladakh.

Kam wow kdaw heini wa ha ka 05-05-20 ha ki bynta mihsngi ka Ladakh da poi chei yadat ki chipai ka ar ri ha nan Pangong. Wei ini da wanrah ko yei yaklam ha pyrdi kini ki ar ri.

Ha u Thohlakhmi waroh arliang da mynjur ki wow kynran dien ya ki chipai wa ki tiar yasiat na ki bynta kani ka nan.

Share this:
Previous

Chah pynkup burom ki le tylli ki Dorbar Chnong ka Jowai kiwa da kynjoh 100% kiwa yoh tika

Next

Pynhiar ka sorkar pyrdi yei dor ki phñiang baam