Shillong: Ka KSU ynne ka sngi da pynsñiaw ko yei pyrchah yong ka yei leh ka sorkar wow e thaw chna Guest House cha kiwi ki jylla ha i thaw wa em mar pyrchah i thaw psiah ka North Eastern Indira Gandhi Institute of Health and Medical Sciences (NEIGRIHMS) ha Mawdiangdiang, Shillong.
Hei yatoh wa ini ka seiñ da lai booh ko ya ka dorkhat ha u Ronnie V. Lyngdoh, Minister I/c Urban Affairs, Government of Meghalaya, Shillong neibhah da suba wa ini i thaw toh yong ka MUDA.
Ka seiñ da pynkynmoo ko wa ka NEIGHRIHMS toh ka thaw sumaar wa da pawnaam katni wei kiwa chah sumaar da wan ki na kylleiñ kylleiñ wei i eh i khoo wa chem kiwa ha yung ha sem kiwa chah sumaar toh kani ka thaw man ko kawa jngai na sor Shillong wei ym em biang thaw sah ya ki paidbah hadooh wa em kiwa lai liwan chnong man ka sngi wei joor i lut i sep ki deiwa sah ki cha ki Hotel wa em ha Shillong.
Hei thaw wow e thaw ya kiwi ki jylla u chna Guest House emkaam ka sorkar u chna ya ki Hotel, Guest House wa kiwi ki thaw sah wow yoh ki paidbah ka jylla Meghalaya u pynemkaam ya ki.
Ka seiñ leh da pynkynmoo ko leh wa ki paidbah toh kiwa jied ya ka sorkar kamtæ ym hoi u mylliñ ko ya ki.
Heijooh i por ka seiñ da ong ko wa ym em pyrchah ko yei chna Guest House kiwi ki jylla neibynta ki paaid yong ki wei ka sorkar Meghalaya leh emkaam u leh ko kamjooh hi.
Da pynkut deiwa ong wa ini i e thaw yong ka sorkar cha kiwi ki jylla toh u pynche ka sorkar neibhah ini da man i pyrchah yei myntoi ki paidbah.
Discussion about this post