Kiwa chong chnong ka Kyndongtuber ynne da mih paidbah ki yow pynyoo yei pyrchah yei thum phiah ya ki MDC Constituency ka JHADC katkam wa da tyrwa da ka Delimitation Committee heiwa ynne da pynman leh ya ka pynsñiaw paidbah namo ka Public Hearing ha Auditorium ka District Library ha Jowai.
Neiliang u waheh chnong ka Kyndongtuber u S. Siangshai da ong u ka chnong toh kawa heh kawa em 3349 Vote heiwa katkam wa da tyrwa kattæ, u phiah ya ka chnong ar lyngkhot heiwa da pynhaap ya ki deilang wa kiwi ki chnong kiwa da jngai palat deiwa phah ya ki cha ka 7-Wahiajer Kyndong wei da yaam rem ki leh wot yei pyrtuid ka chnong da thoh chiteiñ donhi deiwa thoh Kyndong ymtoh dei pyrtuid wa pura iwa man Kyndongtuber.
Kamtæ da ong wa ha kawon ka yurim nadooh na Kyndongtuber chadooh cha Wahiajer neitæ cha Moobakhon, cha Ksehrynchang wa cha Nongmulieh iwa jngai bha wei tang u dro ya ka Map kani ka Constituency leh ym ye neibhah da em ki chnong wa heh kamjooh ki loom ki wah hapyrdi.
Chooh chooh da pynbaad u waheh chnong wa i rukom phiah toh da iwa sop sop wei khlem da yaklam wei ymtip hi leh wa em kani ka Public Hearing lym toh wa yoo cha ki rynsan Social Media neibhah tang ka chithi leh ym em phah.
Kamtæ da ong u wa ym du ki donhi tangwa kiwi ki chnong wa em marjan leh da chah phiah chah kyrriah ki wei i dawa yong ki toh ki chnong wa em marjan toh u em ki hapoh ka jooh ka Constituency.
Discussion about this post