I poor ka khlam namo ya iwa da tip leh kam u khñiang COVID-19 ha ka ri wa kylleiñ kapyrthai da pynbor i ya ka sorkar pyrdi kamjooh ya ka sorkar jylla wow thooh ki laad kammon wow khang wei wow yakhun pyrchah ya u COVID-19.
Ha kini ki sngi wa dadep da mih ki khubor wa ong wa hapoh West Jaiñtia Hills da em i thmu wow pynkylla ya ka thaw sumaar neibynta ki kynthai wa ki khynnah namo ka Maternity & Children Hospital (M&CH) wa em ha Panaliar Jowai wow man ko kam ka thaw sumaar wa kyrpang namo ka Isolation Center.
Katkam ki yutip wa tikna wa da yoh da ong wa ini man i dang hei pyrkhat donhi kam ka laad wow man kiwa da pynkhreh lada poi namo ktah uni u khñiang ya ka thaaiñ.
Ynne ka sngi neiliang ka Dorbar Chnong Panaliar da pyntip ko wa ka chnong hi pyrchah joor ko yeini i thmu wow pynman ya kani ka thaw sumaar (M&CH) kawa ympu em u wai wow pynkylla ya ka kam ka thaw sumaar wa kyrpang namo ka Isolation Centre heiyatoh wow yakhun pyrchah ya uni u khñiang.
I daw wa ka Dorbar Chnong Panaliar pyrchah ko ya ini i thmu toh wa emkaam wow wai chwa ya kani ka thaw kam ka MCH wei wa man ko ka thaw kawa da kær talawiar da ki yung bru ya kawa da tip leh kam ka Residential Area.
Discussion about this post